Kawl ralkap le CDF kar kahngolnak biatam a rawh caah nizaan thokin Mindat khua ah an i kap ṭhan. Uknak firtu Kawl ralkap nih Kyaukhtu khua in RPG in voi tampi an kah hna caah CDF ralkap 1 a thi i 4 hliam an tong.
“Tu zingka 6am hrawngah an kan kah. Kyaukhtu khua um vanlawng tual in RPG in an kan kah thluahmah. Kanmah zong nih kan nunnak thap in Mindat khua kan ven ve,” tiah Mindat mipi vengtu CDF ralkap pakhat nih a chim.
“Mindat khuapi cu RPG in an kap lo. Kanmah CDF umnak hmun tiang minute 3 dan in an kah peng.
“Kawl ralkap RPG nih a khen hna caah Mindat mipi vengtu CDF ralkap 1 thi i 4 hliam an tong,” ati.
Kyaukhtu khua ah bawmtu Kawl ralkap pawl mawṭaw 3 in an phan chap i ralkap mawṭaw 2 cu Mindat khua lei ah an ra, tiah kan theih.
“Atu lio kan boruak ahhin Chin state peng dihlak hmun khat te ah kan cawlcangh ṭi a herh tuk.
“Zei ruangdah Chinmi hi atutiang hmun khat ah kan cawlcangh ṭi bal lo. Kan unau dihlak in kan kah ṭi hna lai an ti riangmang i peng dang ummi pawl zei ruang dah atutiang an cawl bal lo,” ati.
Ralkap nih Mindat khuami 5 an thlah duh hna lo caah May 12 chun ah ralkap le CDF kar kahngolnak biatiam a rawk i zahan zaan thokin kahnak a chuak ṭhan.
Zahan zaan kha Mindat khua hmun 4 ah Kawl ralkap le Mindat mipi vengtu CDF an i kap. 274 battalion sakhan, palik sakhan le bank pawng, tbk pawl ah an i kap hna. — Khonumthung
