US ram ah tuahmi Miss Univere 2020 ah Myanmar ram aiawh in aa zuammi Thuzar Wint Lwin cu Ram Thilthuam Zuamnak (National Costume Competition) ah Laithil in aa zuam.
Thuzar Wint Lwin cu Myanmar ram aiawh in ramdang ah Miss Universe aa zuam ding thimnak ‘Miss Universe Myanmar 2020’ ah Hakha khua aiawh in aa rak zuam i pakhatnak ngah.
Ram Thilthuam Zuamnak kongah Thuzar Wint Lwin nih a tanglei bangin ca a ttial.
Thuzar Wint Lwin: Miss Universe Myanmar zuamnak ah Chin state, Hakha khua aiawh in ka rak i zuam. Atu, Miss Universe zuamnak puaipi zongah Chin thilthuam i hruk in Myanmar ram aiawh in kaa zuam tthan. Ka philh kho ti lai lo.
Hruk kaa timhmi kan ram thilthuam (National Costume) cu a ruang tampi ruangah a phan manh lo. Vanthat ah, US ah ummi Chin miphun hawi hna bawmhnak thawngin Chin thilthuam dawh taktak he kaa zuam kho.
Kaa hrukmi hi hlan lio ahcun Chin hruaitu le bawi hna nih an nupi le an i dawhnak, fimnak le rumnak sunhsaknak caah an tuahmi “Khuang Cawi” puai ah an rak hrukmi hna a si.
Atu ahcun, an dawtmi an fanu le hna zong nih an i hruk cio cang.
Atubantuk in, National Costume zuamnak caah a ka bawmtu Atlanta, Georgia um Chin miphun le Chin Taung Tan cungah kaa lawm tuk hringhran.
May 16 khi Final puai si lai i mah tiang ah thazaang rak ka pe cio hram uh. A tang link ahhin vote pek khawh ka si.
https://cdn.choicely.com/widget.html?cid=18b2d947-b345-11eb-b861-5541e846e73c&h=d&v=grid
