CDF Mindat nih, “Ralkap nih nan tlaihmi pawl thlah hna uh tiin kan hal hna nain an thlah hna lo caah May 12 in tuni tiang kan i kah cuahmah liopi asi,” tiah tunai ah thawng a thanh.
Kan ral tapung Kawl ralkap nih miakpi 152 mm (artillery gun 152 mm), RPG le seh meithal ngan pawl in thazaang a hleihluat tukin an kan kah caah CDF Mindat ralkap paralṭha pakhat a nunnak liam. Mah pin cu a thimi le hliam tongmi fiang tein kan hngal kho rih lo, ati.
Kap hnih ningin hliam tong an um veve
CDF Mindat ralkap biachimtu nih, “Atu kan i kap cuahmah. Meithal thawng nan thei ko lo maw? Mindat khua chuahnak zawn ah Mindat mipi ralkap le Kawl ralkap kan i kap. Kap hnih ningin hliam tongmi kan um veve nain thil sining tling tein kan hngal kho rih lo,” tiah a chim.
“Kawl ralkap nih hmun kip in an kan kah. Chaklei zongin hriamnam ngan pawl in an kan kah. Hriamnam in an kan kah a tam deuh,” ati.
Mindat khuami nih, “Zahan zaan in tuni khuadei tiang an kan kah. Mindat khua cu din loin ni 2 le zaan 2 chung kahnak aa peh cang. Kan khua cu kan ven peng lai.
“Mawtaw pakhat cu a kaang cang. Hmaikal mi mawtaw asi. Zahan zaan khuadei tiang kan i kap. Kawl ralkap cu atutiang khua chung an lut kho lo. Khua leng um kohti kun tiang lawng an phan. Atu hi kohti kun ahcun kan i kap. Khuadei tiang kan i kap,” tiah a chim.
Mindat khua chung zongah ralkap pawl umnak Sipuaizi Bank, Suhpawng Zung le palik sakhan pawl cu zaan ah an kah hna. Mahka hmun ummi ralkap pawl zong nih cun hriamnam ngan an hman.
“Kohti kun ah an hung kai. Hriamnam ngan in an kah hna. Mah ruangah CDF nih an kah ve hna. Khua hi saupi tiang kan veng kho lai maw ti cu kan hngal ve rih lo. Kan si khawh chung cun kan ven ko lai,” tiah khuami pakhat nih a chim.
Kawl ralkap hriamnam ngan kuan nih a khen ruangah Mindat khua chung um cozah rianṭuan inn pakhat a rawk i hliam tongmi zong an um.
Mindat bantukin Matupi le Kanpetlet zongah i kahnak a chuak ve cang.
