Uknak firtu ralkap pawl nih ralzaam bantuk in an i umter i May 21, zaanlei sml 2:00pm hrawng ah Mindat peng, Boekun khuate pawngah Mindat-CDF an kah hna i Mindat-CDF lei in minung 1 a thi, minung 9 hliam an tuar.
“Ralkap pawl cu plastic (moeka) an i aih i mi sawhsawh bantuk in thil an hruk. Meithal he an ra. Plastic an i aih caah security ttuanmi le CDF nih ralzaam ah kan ruah hna.
“Kan pawngte an phak hnu ah a kan kah. Mah ahcun kah hram aa thok. Hriam ngan zong an hman. Ruah a sur caah harnak kan tong ngai. Kan meithal hi puahceh a si caah ruahpi sur a sinpi lo.
“Cu ruangah, kanmah CDF leiin minung pakhat a thi. Minung 9 hrawng hliam an pu. Ralkap leiin minung 3 hrawng an thi ve,” tiah Mindat-CDF lei in ttuanvo ngeitu pakhat nih a chim.
Nizaan kahdohnak ah ralkap lei hi minung 100 hrawng an si i zaanlei sml 2:00pm in zaanlei sml 6:00pm tiang hrawng an i kap.
Tuni May 22 zong ah ralkap lei nih Boekun khuate lei ah ralkap thazaang an chap i Mindat khua nichuah chaklei Htinchuang chaklei zongah ralkap thazaang 100 len an chap caah kahdohnak a chuak kho tthan tiah kan theih.
Boekun khuate cu Mindat le Kanpetlet khua kar ah a ummi si i Boekun khuate pawng, Mahtat khuate ah ralzaam sakhan a um.
Mindat ah ralkap le CDF kar i kahnak ruangah Mindat khuami 6,000 in 8,000 kar cu an nun himnak caah ramtang an zaam hna. Facang, chiti, cite, puan le siiai tiin bawmhnak tampi an herh. – Khonumthung
