Myanmar mipi thimmi cozah uknak a chuttu ralkap bawizik Min Aung Hlaing nih thla 6 hnu tuni ah, “party dihlak telh in 2023 ah thimnak kan tuah lai,” tiah a chim ṭhan. Uknak a firka zongah “2020 November thimnak a dik lo caah uknak kan lakmi asi, kum 2 chungah thimnak dik kan tuah lai” a rak ti lengmang cang.
“Kum 2023 August thla tiang uknak ka tlaih lai,” ati. Mah hnu ahcun thimnak tuah dingin a chim.
“ASEAN ram pawl nih Myanmar ah an thlahmi palai he paoh rian kan ṭuanṭi ko lai,” tiah, Asia ram 10 i funtomnak bu ASEAN nih Myanmar buainak daihter dingin palai thlah an timhmi kong a chim fawn.
“ASEAN phungphai ning tein rianṭuan ṭi dingin ready kan si. ASEAN nih Myanmar ah an thlah ding palai he zong tonbiaruahnak ngei dingin ready kan si,” ati.
ASEAN chungtel Asia ram 10 hruaitu pawl cu thaizing hi meeting an tuah lai i Myanmar ah thlah ding ASEAN palai thimnak an tuah lai.
ASEAN palai nih cun uknak firtu Kawl Ralkap le dotu phu pawl biaruahnak ngei dingin a forhfial hna lai.
2020 thimnak cu thimnak zung (UEC) le thimnak zohfeltu ramdang palai pawl nih cun “a dik ko” an ti nain uknak firtu Kawl Ralkap le a tapeh USDP le Rakhine party nih cun ‘a dik lo’ an ti. Ralkap nih cun thimnak tuah hmanh hna sehlaw a dik lai lo tiah Myanmar mipi nih an zumh caah thimnak tuah ṭhan cu an duh lo. NUG cozah zong nih a duh lo.
