CDF nih RC Siangbawi Father Noel Hrang Tin Thang le a zultu Clement Cung Hnin an tlaihmi hna kong cu Hakha peng RC upa pawl nih RC thawngzamhca Union of Catholic Asian News (UCA News) le Vatican News sinah atanglei bangin an chim.
Father Noel Hrang Tin Thang cu June thla thokka ral lio ahkhan Surkhua RC biakinn ah a zaammi tar, nu le ngakchia pawl a bawmmi hna si, tiah Hakha peng RC upa pawl nih an chim.
“‘CDF nih Father Noel Hrang Tin Thang cu ralkap sinah thawng a thanh, ralkap sin in sii ai bawmhnak a lak i mipi zong ralkap bawmhnak i lak ve dingin a forh hna’ tiin sual an phawt,” tiah RC thawngzamhca UCA News le Vatican News nih an ṭial.
Sinain, CDF nih a tlaihnak hna aruang tling tein an ṭial lo. CDF-Hakha umnak lei ah a kalmi Kawl Ralkap 57 Surkhua le Hausen kar ah a donmi hna kong, Pathian rianṭuan asi buin mah pumpak miatnak caah Kawl Ralkap he i bawm in sipuaizi a tuahmi kong, Kawl Ralkap tuahmi Tender zong Seng Thang company Managing Director a sinak min in a lak i a tuah cuahmahmi kong, tbk an ṭial chih lo.
CDF nih cun, “Father Noel Hrang Tin Thang hi biaknak ruangah kan tlaihmi asi lo. Kawl Ralkap he aa pehtlaih ruangah kan tlaihmi asi. Kan tlaihnak aruang cu:
- Surkhua ah Kawl Ralkap umhmun khuar an duh i Senthang le Surkhua lemsoi dingin Father Noel Hrang Tin Thang an hman i Kawl Ralkap he an i pehtlai lengmang.
- Kawl Ralkap tuahmi Tender cu Seng Thang company Managing Director a sinak min in a lak i a tuah cuahmah.
- Hakha in CDF-Hakha Battalion 2 (Senthang) umnak lei ah a kalmi Kawl Ralkap 57 cu July 1 ah Surkhua le Hausen kar ah a don hna.
- Hakha um Kawl Ralkap nih sii bawmhnak in mi lemsoinak an tuahmi cu July zarh 1nak ah Hakha ah a va lak pinah Senthang zong Kawl Ralkap bawmhnak i lak ve dingin a forh hna.
- CDF-Hakha ningcang lo le thil diklo a lengah Messenger in ca a kuat hna.
“Hihi amah bia kan halmi, a phone kan zohmi le tatte thil kan tlaihmi in kan hngalhmi asi. Kan tlaih hlan ah kan auh i hihi tuah ti hlah tiin voi 2 tiang warning kan pek nain zei a rel loin a tuah peng caah kan tlaih,” ati.
Father Paul Thla Kio nih, “Father Hrang Tin Thang le Kawl Ralkap bawipa an i ton lio CDF nih an hmuh hna. Kawl Ralkap bawipa hi RC asi i a pumh zong aa pum tawn. Kan inn zongah a kan leng pah tawn. A taktak ahcun, Father Hrang Tin Thang nih Kawl Ralkap bawipa cu ‘i kah (buainak) cu hrial ko tiin a forhfial,” tiah RC thawngzamhca Vatican’s Fides news agency ah a chim.
Ruah awk ummi cu…
Father Hrang Tin Thang nih buainak cu hrial ko tiin Kawl Ralkap bawipa a forhfial a timi hi an i ton lio ah Father Paul Thla Kio a um ve i maw si hnga asiloah Father Hrang Tin Thang a ṭanh tuk caah a ruahnak in chimmi maw si hnga?
CDF nih, “Father Hrang Tin Thang hi Surkhua in Hakha ah ṭhial ulaw a zulh ding biakamnak kan tuahmi ah RC upa 2 nih minthut ulaw kan thlah hna lai,” ati ko cangmi zei ruangah dah Hakha peng RC upa pawl nih Kawl Ralkap le vawlei pumpi theih dingin English in news an ṭialter hna hnga, media an i ruaih hnga? Nunnak pek in Kawl Ralkap a dotu kan naule CDF himnak caah father pakhar Surkhua in Hakha ah ṭhialter le minthut piak cu mah tluk cun maw a har ko hnga?
CDF nih Father Hrang Tin Thang sual a phawtmi acheu lawng RC thawngzamhca nih an ṭial i Pathian rianṭuan asi buin pumpak miatnak caah Kawl Ralkap he i bawm in sipuaizi a tuahnak kong, Seng Thang company in Kawl Ralkap tender a lakmi kong an ṭial chih lomi hi zei ruang dah asi hnga? A rianṭuanmi he aa tlak lo caah a zohchia an ti caah maw si hnga asiloah Kawl Ralkap tender a lakmi kan langhter ahcun Kawl Ralkap thawng a thanh pah lengmang khawh tak ko hna tiin careltu nih an ruah lai ti an phan caah maw si hnga?
Father Hrang Tin Thang nih a tonmi Kawl Ralkap bawipa hi RC asi taktak hnga maw asiloah CDF-Hakha kong theih duh ruangah RC bantukin aa um termi, sungṭhoh a tuahmi si hnga maw? Kawl Ralkap sungṭhoh tuah daan cu theih pah cio si ko i….
CDF nih hin hngalh huaha loin an tlaihmi maw si tak ko hnga, CDF palh cu maw si ko hnga? Na ruah ning comment ve.
