Malaysia um Chinmi nih bochan tukmi Rev. Mang Vung Lian nih tu zingka ah Ampang Sizung ah COVID-19 in a kan liamtak.
COVID-19 zawtnak in sizung ah zarh 1 chung aa thlop nain dam khawh loin tu zingka ah a kan liamtak ruangmang.
Chinmi hna caah UNHCR zung RSC department ah kum tampi chung holhlet a ṭuanmi asi.
Liamcia kum 3 hrawng khan Kuala Lumpur um Malaysia Lautu Christian Fellowship nih an khrihfabu pastor caah an lak i a hmaikum ah ordain an pek — Malaysia a rat hlan ah Bible sianginn a rak dih cangmi si.
Lautu lawng si loin Malaysia um Chinmi tampi nih bochan tukmi kan pa asi.
A nupi le an fale 3 a rohtak hna. An fale an ngakchia tuk rih i zoh ah ngaihchiat a zual khun. Bawipa tu nih tantakmi chungkhar umpi ko hna seh.
Naite ah Malaysia Chinmi zohkhenhnak bu ACR Chairman in aa dinmi James Bawi Thang Bik nih, “Pastor Mang Vung Lian, tu zingka ah na thawngpang ka theih cu kai zumh kho hrim lo ee. Ka zaangder caan paoh ah ka lu cungah kutchuan in thla na ka campiak tawn lio kaa hung thei ruangmang.
“Ka rianṭuannak le ka hmailei kongah ruahnak aa ka cheu zungzal tu! Ceih ding ka ngeih paoh ah ‘biakinn ah na um maw?’ tiin phone kan chawnh i saupi bia kan i ruah tawn kha. Atu cu nangmah na um ti lo hnu cun biakinn zong a king tuk lai!
“Ruahnak aa ka cheutu, ka zohchunmi le ka upat i ka pa bantukin ka ruahmi Rev. Mang Vung Lian,” tiah a sian lonak kong a ṭial.
Atu mah ca kan ṭial lio tiang ahcun Ampang Sizung ah a ruak um rih. Ruak laknak caah UNHCR caṭialpiak hna a hauh caah an la kho rih lo.
Atu lio cu COVID-19 lockdown ruangah mibu nih ruak humh a ngah lo caah upa 5 hrawng lawng nih an vui te lai.
