Rung Lian Ceu nih, “Biak Hmun Sang nih aa ka teimi kha ka lungfak nain aa ka tei ning kha kai lungsi tuk,” tiah a chim.
“Sinain, aa ka teimi kha ka caah a ṭha tuk. Kum 5 leng chung hohmanh nih tei lomi champion ka si tikah gym tuah duhnak thazaang ka ngei lo chin lengmang. Ka tha tho lo chin lengmang.
“Atu cu Biak Hmun Sang nih aa ka tei cang caah a thar in gym tuah duhnak thazaang ka ngei ṭhan. Ka caah a ṭha tuk,” ati.
Biak Hmun Sang cu a ṭhawng ko
Rung Lian Ceu nih, “Kei hi thil a hman ning tein chim kai zuam ko lai i … Biak Hmun Sang cu a ṭhawn zong a ṭhawng. Hmasa kan rak i paih lio tluk kha si sehlaw, rak ṭhangcho hlah sehlaw aa ka tei kho hnga lo, amah zong hmasa kan i paih lio nakin tampi a ṭhangcho,” tiah a chim.
Biak Hmun Sang lawng nih Rung Lian Ceu a tei rih
Rung Lian Ceu nih, “Kum 18 ka si in paih kaa thok i atutiang ah voi 18 ka pai cang. Voi 15 bual ka co i voi 3 ka sung. Aa ka teimi 3 cu Tial Cung Thang, Kap Tawng le atu ah Biak Hmun Sang hi an si,” tiah a chim.
Nain, Tial Cung Thang cu kum 2018 ah Rung Lian Ceu nih a tei ṭhan cang.
Kap Tawng zong kum 2015 ah Rung Lian Ceu nih a teiṭhan cang. Atutiang ahcun Biak Hmun Sang lawng nih Rung Lian Ceu atei ti khawh asi.
Biahalnak nganbik cu, Rung Lian Ceu nih Biak Hmun Sang a teiṭhan lai maw? timi hi si. Rung Lian Ceu nih a singkhaw i aa phomhṭhan ding an si. Rung Lian Ceu nih a tei ahcun vawlei cung Laipa hohmanh nih an tei lo tinak asi lai.
Rung Lian Ceu, kum 27 cu 1994 July 3 ah Chuncung khua ah a chuak. 2006 December 16 kum ah Malaysia a phan. 2007 September 13 ah USA a phan.
