CDF-Thantlang nih, “Kawl Ralkap le palik pawl nan hriamnam tling he kan sinah ra lut ulaw laksawng tangka ting 60 kan in pek hna lai,” tii thawngthanh.
“Uknak chuttu Ralkap cozah nih phungninglo in mipi thahnak caah a hmanmi ralkap le palik pawl, mipi lei ṭan le mipi nih bochanmi minung si nan duh ahcun CDF-Thantlang nih lunglawm tein kan in cohlan hna.
“CDF-Thantlang he i bawm in ralkap cozah dohṭi dingin hriamnam tling he kan sinah a rami ralkap le palik pawl cu tangka ting 60 bakte kan in pek hna lai.
“Hriamnaam aa zaampi kho lomi ralkap le palik pawl, le CDM a lutmi vialte zong dornak kan in pek hna lai,” ati.
Cozah asi lomi nih cun hriamnam cawk khawh asi lo caah a thlithup in cawk asi. Tlaih ton sual ahcun dantatnak a fak ngai. Cucaah hriamnam cawk le Laitlang luhpi hi a fawi lo ngaimi asi.
Laitlang um Kawl Ralkap tam nawn nih an hriamnam tling he CDF sin an luh ahcun a ṭha ngai. An hriamnam pinah anmah mipum zong nih an bawmh hna lai va si kaw, mah i tangka ting 60 pek cu hmun dangah hriamnam cawk nakin a hlawk deuh tuk. A thlithup in hriamnam (meithal, kuan bawm, kuan tampi, tbk) cawk i Laitlang luhpi khawhnak ding ahcun ting 60 leng hmanh a dih khomi si.
Kawl Ralkap le palik pawl an hriamnam tling he CDF sinah lut thluahmah hna sehlaw ṭha tuk hnga.
