Europe ram 27 komh hluttaw (Europe Ramkomh Hluttaw) nih CRPH le NUG a cohlan.
Nizaan tihni (Nilini) ahkhan Europe Ramkomh Hluttaw ah chungtel ram 27 in MP pawl nih “CRPH le NUG kan cohlang lai maw?” tiin vote an thlak. MP 647 nih cohlan dingin an thlak, 2 nih cohlan lo ding le 31 cu an i sum.
Cucaah, “CRPH le NUG lawnglawng hi Myanmar mipi duhmi democracy aiawhtu asi tiin Europe Ramkomh Hluttaw nih kan cohlan,” tiah bia an chah.
Europe Ramkomh Hluttaw nih CRPH le NUG a cohlan cu uknak firtu Myanmar ralkap cozah caah ningzak taktak asi. Ramdang nih Myanmar cozah taktak ah kan cohlang hna seh tiin an i zuam lenmi cu ek khor lei a panh thluahmah ko. Atutiang ahcun ramdang thinlung ah mipi duhmi NUG nih a tei ngaingai – kan tei thluahmah ko.
Tu zarh thokka zong ahkhan, France Hluttaw Sang (Senate) nih NUG a cohlan cang. Hluttaw Niam nih a cohlan ve ahcun (a cohlan ding a fiang ko) France ram hi phungning tein NUG a cohlang hmasa bikmi ram asi lai.
France ram hi phungning tein NUG a cohlang hmasa bikmi ram asi te men lai.
Europe Ramkomh Hluttaw nih CRPH le NUG cohlannak upadi a fehtermi ahcun;
1. Myanmar ralkap nih mipi na hrem le thah pengmi hna hi ‘minung cungah sualnak tuah hramhram’ asi kho cang, tiah Min Aung Hlaing hruaimi mifir cozah cungah fak piin lungtlinlonak a langhter chih — Nilini tiang ah uknak firtu ralkap cozah nih mipi 1,159 a thah cang hna. Inn le khua tampi a khangh cang hna.
2. Phuahchom case in na tlaihmi President Pu Win Myint, Rampi Ruahnak Petu Pi Aung San Suu Kyi le adang vialte hi zei cukha ti um loin a rannak in thlah dih hna, ati.
3. China le Russia zong hi UN Security Council ah zungzal chungtel nan si thawngin a hmanungbik bia chahnak nawl nan ngeihmi hi sullam ngei tein hmang ulaw Myanmar kong ahhin thil dik ṭanpi uh, ati hna — US, UK le France nih uknak firtu ralkap cozah dantat dingin UN Security Council ah a biapi taktakmi policy an chuahpi mi cu China le Russia nih an rak kham caah zeihmanh hma lak khawh asi lo. China le Russia hi Myanmar mipi harnak a kan petu an si.
4. Germany, France, Italy, Norway, Sweden, tbk Europe ramkomh chungtel ram 27 zong nih uknak firtu Myanmar ralkap cozah tangka luhnak a simi sipuaizi vialte phit thluahmah hna uh. Cun uknak firtu le a bawmtu vialte dantat thluahmah hna uh, ati.
5. Myanmar innpa ram 10 i funtomnak bu ASEAN (Malaysia, Brunei, Cambodia, Indonesia, Laos, Myanmar, Philippines, Singapore, Thailand le Vietnam) zong nih Myanmar boruak kong ahhin khat lei phu lawng tong hna hlah, NUG le zatlang bu lutlai vialte zong tong chih hna, ati.
Atutiang ahcun, ASEAN palai cu ralkap cozah nih Myanmar luhnak nawl a pe duh lo. Mah ruangah ASEAN nih a ingpuannak kong voi tam ngai chim cang.
