Kawl Ralkap pawl Kalaymyo in an hung kai lio October 11 ahkhan Falam peng Tuphei khuami 2 an kah thah hna.
An ruak cu tuni October 13 ah lamkam ah kan hmuh, tiah khuami nih an chim.
Kawl Ralkap nih an kah thahmi 2 cu Thawng Lun Mang, kum 29 le Salai Thawng NNei Mawi, kum 34 an si.
Tuphei khuami pakhat nih, “An ke in Zawngle khua lei ah an kal. Ralkap pawl cu Zawngle khua in Falam lei an ra. Mah zaan cu an ṭin lo caah an tlaih hna hnga maw tiin an chungkhar an lungrethei tuk,” tiah a chim.
“Nizaan ah kawl kan timh hna nain ralkap an um rih caah kan ngamh lo i tuni ah kan kawl hna. Kalay in 81.5km a hlatnak zawn lam kam pe 2 hrawngah thisen kan hmuh. A pawngkam kan kawl cu Thawng Lun Mang ruak kan hmuh. A mit ah meithal kahnak hma a um.
“Aruak in a hlat tuk lonak zawn ah Salai Thawng Nei Mawi ruak kan hmuh ve. A paw ah meithal kahnak hma 4 um.
“Hmasa ahcun, an ruak tangah bomb an hmenh sual lai tiin ruak kan la ngam lo. Tu chun 12pm ah an ruak cu kan lak i a rannak in RC Father nih a vui hna,” tiah a chimchap.
Kawl Ralkap pawl cu Laitlang an hung kai pah in lampi ah duhpaoh in meithal an puah caah Falam peng Zawlnu khuami pakhat tlanglo rian a ṭuan lio ah a khuk ah kuan nih a khen.
Ref: Zalen
