CNF ralkap Senhnih/Corporal Aung Lin Tin nih tuni October 20 ah a dawtmi Chin miphun le ram caah a nunnak pek, tiah CNF nih a thanh.
“Aa pekchanhmi cungah CNF nih upatnak kan pek. Tantakmi chungkhar dihlak nan ngaihchiatnak kan in tuarpi hna,” ati.
CNF le ralhrang Kawl Ralkap cu tuni ah Dokthek le Chuncung khua kar ah an i kap.
Corporal Aung Lin Tin hi tuni kahdohnak ah a nunnak liammi maw si asiloah hmasa kahdohnak ah hliam ton in tuni ah a liam dah si ti balte cu CNF nih a langhter lo.
Nizaan ah CNF biachimtu Salai Htet Ni nih, “Nizaan tiangah ralhrang Kawl Ralkap he Falam le Hakha kar ah voi 10 hrawng kan i kap cang.
“Kanmah lei minung 1 hliam a tong. Kawl Ralkap 30 hrawng kan thah hna. 40 leng kan hliam hna. Motor 16 leng kan hrawh piak hna,” tiah a chim.
Kawl Ralkap pawl cu tu zaanlei 3:30pm hrawngah tank 2 le motor 50 hrawng in Hakha an lut cang [hmet law relchap].
October 12 ah Kawl Ralkap 700 hrawng cu Kalaymyo lei in motor 60 leng le tank 2 in Falam khua an phan.
October 13 ah Hakha lei an kal nain lampi ah CNF, CDF le CNDF nih an kah lengmang hna caah an i tap lengmang i tuni ceo an phan kho.
Falam – Hakha lam um Rialti, Lungpi, Taal, Thlanrawn, Tlangzar, Ramthlo, tbk khuate pawl ah biakinn telh in inn 30 hrawng an khangh hrawh hna.
An khangh lomi inn pawl zong an baoh dih i rawl le innchung thil vialte an fir hrawh piak dih hna.
Nizaan an riahnak Ramthlo khua zongah inn 100 hrawng an baoh i inn chung thil vialte an fir, hrawh khuai piak dih hna. Vok, ar, tbk innzuat saṭhil zong an thah ei piak dih hna.
