Hakha ah ralkap nih Dr. Lian Hmung Sakhong inn (CHRO Zung) tuni ah an ting/fir.
Dr. Lian Hmung Sakhong nih, “Hakha um ka inn cu Min Aung Hlaing le a ralkap nih an fir/ting. Kan ram le mipi luatnak caah kan ngeihmi zeizong vialte kan sung dih. Kan inn an kan firpiak, an kan hrawhpiak, nain kan thinlung cu zeitik hmanh ah an fir in an hrawk kho bal lai lo. Mi ṭhalo cu tih hna hlah uh! Pathian nih a kan umpi lai!,” ati.
NUG cozah Federal Ram Dirhnak Vuanci Dr. Sakhong inn hi Chin Nuhrin Covo Bu (CHRO) nih an hlan i zung caah an hmanmi asi.
February 1 ah ralkap nih uknak an fir hnu in Dr. Sakhong inn (CHRO Zung) hi chun lailing ah voi 2 khelte an baoh i a chung ummi computer le thilri pawl an lak lengmang.
Ralkap nih Chin state ah thil ṭha lo an tuahmi vialte cu CHRO nih hmanthlak he ṭha tein cazin a lak dih i Mirangca in UN le US cozah sinah a phozar peng hna.
Mah pinah, inn ngeitu Dr. Sakhong zong cu ralkap dotu NUG cozah vuanci pakhat asi pinah CNF/A zong asi i ralkap dohnak bia zong a chim pengmi asi.
Mah ruangah an tingnak si dawh asi.
CHRO Zung (Dr. Sakhong inn) kutka ahcun ralkap nih, “Mah inn hi cozah a kan dotu pawl umnak asi…” tiin catar an benh.
“Mah ruang ahcun Ralhrang Dohnak Upadi Dal 56 ningin cozah caah kan ting…” an ti.
Ralkap nih February 1 ah uknak an fir cangka in CHRO nih an zung cu an chuahtak cangmi asi. A lawnnak a sau ngai cang.
