Australia ram, Sydney khuapi ah COVID-19 hrik thar ‘Omicron zawtnak ngei minung 13 kan hmuh cang hna’ tiah tuni ah NSW state Ngandamnak Vuanci nih a thanh.
Queensland state zongah Omicron a va karh ve kho cang men, tiah an zumh.
Cucaah state cheukhat le territory cheukhat nih cun an state le territory ah chawhvah an rengh deuh thluahmah cang.
Nizaan ahkhan Australia ram chungah avoi 1nk bik Omicron a karhmi an hngalh. Sianginn kai liomi ngakchia pakhat sinah Omicron zawtnak hrik cu an hmuh. Tuni ahcun minung 13 sinah an hmuh manh.
Minung tampi sinah karh cang dawh asi (minung tampi an i chawn cang men lai), tiah an zumh.
Queensland state Ngandamnak Vuanci Zung nih, “South Africa ram a tlawnnak in a hung kirmi pakhat sinah COVID-19 hrik kan hmuh. Delta asi an ti nain kan fehter kho rih lo, nain Omicron asi kho men tiah kan zumh caah Omicron asi ko lai tiin hma kan lak,” ati.
Chinmi tampi umnak South Australia state cozah nih, “New South Wales, Victoria le Capital Territory in kan state a rami paoh cu COVID-19 hrik nan ngeih/lo test dih nan si cang lai,” tiin tuni ah thawngthanh.
Thla tampi chung state ramri a khar i liamcia ni tlawmpal khan a on. Tuni ah thinphang in a um colh.
Chinmi tampi an umnak Australia ram minung tambik 2nk state a simi Victoria ahcun raikhamsi voi 2 ning tein aa chun cangmi lawng sizung le thilpuan dawr kal le rianṭuan khawh asi, tiin state cozah nih nawl a chuah. Raikhamsi chunh a duh lomi pawl nih biatak tein sandah an piah.
Australia rammi kum 16 cung cu an dihlak dengmang (88%) hrawng raikhamsi tling tein an chunh cang hna.
Australia ram ah voi tam nawn COVID-19 zawtnak a karh cang nain, minung tambiknak khua Melbourne le Sydney cu a thlathla bakin lockdown an tuah caah ram rum dang tlukin a zawmi le thimi an tam lo, tiah Vawlei Ngandamnak Bu (WHO) nih a thanh. Buaktlak in tuak tikah Australia ram ahcun minung ting 1 chungah 834 lawng COVID-19 zawtnak an ngei i 8 lawng an thi, ati.
Atutiang ahhin minung 25 million umnak Australia ram ahcun COVID-19 zawtnak ngei 215,000 lawng an hmuh rih hna i 2,042 lawng an thi.
