Atu lio cu Malaysia um Chinmi hohmanh Australia kal a ngah rih lo. Visa a ngah cangmi Chinmi an tamtuk i Christmas hlan ah phanh an duh tuk cio hna… nain thachiat tuk awk asi lo, a dongh tiang rel khawh i zuam ve.
COVID-19 hrik thar Omicron ruangah Australia cozah nih December 15, 2021 tiang ramri a khar chung.
Cucaah, ralzaam visa (200, 202, tbk) a ngah cangmi vialte zong December 15 tiang cu hohmah kal khawh asi rih lo.
Sinain, visa a ngah cangmi chungkhar minung cu ‘travel exemption’ sok in ngah ahcun kal khawh asi ko. Chungkhar minung ti tikah;
- Nulepa (Australia ummi nih Malaysia um na nu/pa na lakmi – muaisa nulepa le nuei paei zong)
- Kum tlinglo fale (Australia ummi nih Malaysia um kum 18 na fale na lakmi hna)
- Nupi/va (Australia ummi nih Malaysia um a nupi/va a lakmi)
Mah hmanh hi ‘travel exemption‘ sok i ngah lawngah kal khawh asi. Sok tikah a herhmi (birth certificate, merriage certificate, passport, tbk) tamtuk i a buaithlak ngai caah ngah/lo zong a fiang lo.
December 15 hnu in kal a ngahte lai
December 15 hnu cun visa a ngah cangmi paoh cu rat khawh asi ko lai, tiah Australia cozah nih a thanh.
Ralzaam visa (200 visa, 202 visa, tbk) a ngah cang i COVID-19 raikhamsi tling tein (voi 2 ningin) aa chun cangmi paoh cu December 15 thokin rat khawh asi ko lai, ati.
Cucaah thachiat tuk awk asi leemlo. Atu hi December 8 si cang kaw ni 7 lawng aa duh cang.
Mah karlak ah COVID-19 zawtnak a karh tuk i Australia cozah nih ramri a kharmi a sauh ahcun phun dang si hnga.
Thawngpang thar um cun thanh khawh kan i zuam ṭhan te lai.
Tangka liam in Australia kalnak (CSP) kong mah hi hmet law rel khawh asi.
