Uknak firtu Myanmar ralkap nih Sagaing ramṭhen ah khuami 11 an kah hna i an nun buin an khangh thahmi hna kong cu UN nih fak taktakin duhlonak cathanh a chuah.
“Hi tluk chiakha in khuami a thattu pawl hi an tuahsernak theipar zunter hrimhrim hna ding an si,” tiah UN lutlai aiawh biachimtu nih a chim.
“Nihnihni zingka ah Sagaing ramṭhen, Salingyi pengah Myanmar ralkap nih khuami 11 tuksapur taktak in an khangh thahmi hna cu kan lungṭha lo tuk hringhran.
“An thahmi hna lakah ngakchia 5 an i tel, tiah rinhtlak media pawl nih an thanh.
“Hi bantuk thahnawnnak cu UN nih fak piin kan duhlonak kan langhter.
“Ramkip upadi bangin, rammi ven le himter cu nan rian asi ti hi Myanmar ralkap hruaitu pawl theihter ṭhan kan in duh hna.
“Hi tluk a chiakhami thil a tuahtu pawl hi an tuahsernak theipar zunter hrimhrim hna ding an si.
“Myanmar ralkap nih thahnawnnak an tuahmi paoh cu UN nih a fak bikin duhlonak cathanh kan chuah peng.
“Hi bantuk thahnawnnak hi cu cohlan khawh hrimhrim asi lo, cucaah ramdang vialte nih lehrulhnak fak taktak tuah uh tiah kan in forhfial hna.
“Myanmar ralkap nih February 1 ah uknak a lak hnu in December 8 tiangah, hriamnam ngei lo rammi 1,300 leng a thah cang hna. Ngakchia 75 an i tel,” ati.
