2020 Thimnak ah Pumpak in Chin State Hluttaw ṭhutden aa cuh vemi Salai Lungthli Tum nih;
- Ram ṭha phak khawh hi kan miphun caah a ṭha, ralzaam sok nan doh awk asi lo, ati
- Cun, Thantlang ralhrang sakhan kan lak thawngin democracy kan ngah lai lo, cucaah Thantlang ralkap sakhan caah kan mino hna nunnak liam hi a paam tuk (aphu lo), ati
Ram ṭha phak khawh khi kan miphun caah suikhor bantuk a si, Laimi cawmtu cu ramṭha a phanmi an si. Ramṭha ah kan unau tam deuh an phak khawh ding khi kan miphun caah thilṭha tuk asi, ṭihnungmi thilchia a si hrim lo.
Ram ṭha ah kan unau tam deuh an phak khawh nak hnga bochanmi kan pale nih UNHCR le ramdang cozah hna sin ah biatak tein chimrel le advocacy nan tuah a herh tuk caan a si.
Dothlennak a tuahtu phu zong nih refugee sok hi thazaang nan pek lo hmanh ah biatak tuk in nan doh awk a si lo, tulio cu MAH tluk deng in refugee sok nan dohmi hmuh tikah lung a tha lo.
Ram ṭha phanmi le a phan te dingmi hna nih Chinram an sersiam khawh bik te lai timi kan i fiang a hau tiah ka ruah.
Democracy a kan ngahter lo ding Thantlang ralhrang sakhan caah kan mino nunnak sungh a phu lo
Kan pasalṭha hna nih Thantlang sakhan khi nunnak tampi pek in la kho taktak hna sehlaw democracy cu kan ngah hlei hnga maw? Thantlang innlo teh a him deuh hnga maw? Vanlawng he tank he bomb an thlaknak hmun ah maw ai can deuh hnga?
Man a ngeilo mi sakhan kha man a sang bikmi kan mino hna nunnak in thlen a duhmi ramṭha khuasa nan tam ning zoh tikah lungrawk taktak khi a si.
‘Nan ralchia ee, Thantlang nan veng kho lo ee, sakhan cu nan la ngam rih lo maw?’ tibantuk in nan zai hnawh tuk hna. Phaisa thawhtu nan si ve caah nan hmai khah lo lung in raltuk ai thawhmi kan mino an tampi lai. Cheukhat an nunnak a liam thai. Ngaih a chia hringhran.
Yangon, Mandalay le Naypyidaw ah Kawlmi nih biatak tein an doh hlan chung cu Laitlang ah a ṭhahnem lomi sakhan lak le khuachung kah ding cu rak forh hram ti hlah u. Phaisa nan thawhmi nakin kan mino nunnak le a ciammi innlo man a let thong in a fak deuh timi rak thei cang u, ramdang in saza ṭuan duhtu pawl.
Chin ramkheltu dang hna hmurka:
- Salai Dokhar nih Thantlang kong a chimmi mah hi hmet law rel khawh asi.
- Salai Ceu Bik Thawng nih tutan dothlennak kong a chimmi pawl mah hi hmet law rel khawh an si.
Theihternak: Salai Lungthli Tum siseh, Salai Do Khar siseh, Salai Ceu Bik Thawng siseh, an chimmi bia hi The Chin Express nih kan pom/lo tinak asi lo. A ṭha tiah an ruahning cio in ram le miphun caah ramkheltu an si bang, kannih rian cu an chimmi mipi sin phakter tiang lawng asi. Pom/lo bia chahnak cu a ngaitu le reltu mipi nan ta asi — Kan ruahnak aa khatmi pa bia lawng mipi sin phakter i kan ruahnak aa khat lomi pa bia mipi sin phakter duh lo (kap ṭanh ngeih) cu kan si khawh tawk in kan hrialmi asi.
