Tuni khua dei hlan ah Sweden rili ah thil phor tilawng 2 an i pah caah minung 2 an tlau, tiah Sweden Rili Zohkhenhnak Zung nih a thanh.

Tilawng an i pahnak rili cu Sweden ram Ystad khuapi le Denmark ram, Bornholm tikulh kar i Baltic Sea ah asi.

“Khua dei lai 3am fai ah, thil phor tilawng 2 an i pah tiin vanlawng le rili hartong chanhtu zung nih thawng a kan thanh.

“Tilawng pakhat cu aa let i a boktakhup in um. Mah tilawng aa citmi minung 2 cu rili chungah an tla.

“Rili chung a tlami 2 cu sethle 9 le helicopter 1 in kan kawl cuahmah hna lio asi,” tiah Sweden Rili Zohkhenhnak Zung hruaitu Linde nih a chim.

Tilawng aa pahmi 2 cu UK company ta le Denmark company ta an si.

Denmark thil kuatnak company pakhat i manager Soren Hoj nih, “Kan tilawng mongtu minung 2 an si. A tlaumi 2 hi anmah an si men lai tiah kan zumh,” tiin thawngla sinah a chim. — AFP