2020 Thimnak ah pumpak in Pyithu Hluttaw MP aa rak cuhmi Salai Dokhar cu ralhrang ruangah India ram ah a zaam i UNHCR le India cozah cungah a lungfak ngai.

Salai Dokhar nih, “India ram cu zei tluk in dah a chiat ti ahcun, India hrambunh UNHCR hmanh hi Myanmar ralzaam bawm kho lo dingin a kham,” ati.

“UNHCR le India cozah nih an kan bawmh lai ti ruahchannak in India ram ah hung zaam hlah uh.

“Nanmah tein nan i zohkhenh khawh lawngah India ram ahcun ralzaam dirhmun in um khawh asi. Mah hmanh cu, India palik nih an duh tik paoh ah an in tlaih khawh hna.

“Keimah zong [Kawlram ah] ni 124 chung thong an ka thlak i hitin hma an ka hmuah. Ka thilri zong an ka chuh dih. Ka dam lo tiin UNHCR sinah bawmh ka hal hna nain a zoh hmanh an ka zoh duh lo.

Salai Dokhar cu Mandalay ah sandahpiah ruangah ralkap nih an tlaih i ni 124 chung thong an thlak. An velhnak ah fak tukin hma an hmuah. Thonginn a chuah cangka in India ah a zaam i ‘India for Myanmar’ tiin ralkap duhlonak a va langhter than. Kawlram ralkap nih an velhnak a hma a por i UNHCR sinah bawmh a halnak ni 3 si cang nain atutiang an pehtlai lo, tiah Salai Cung Dawt nih a chim.

“Ka dam te tik ni khatkhat ahcun India hrambunh UNHCR le India cozah hi cu Myanmar ram i kan ral 2nk an si caah ka si khawh chungin ka doh hna lai.

“Hitin zoh sawh ahcun UNHCR zong hi nawlngeihnak aa hruhpi lai i duh paoh in a um thai lai,” ati.