Malaysia ram, Puchong khua ah ummi Pu Hmung Reng te inn mifir nih an baoh i tangka RM10,000 leng (Kawlram ting 40) an firpiak hna.
Pu Hmung Reng @Thawngthawngpa cu The Chin Express nih kan pehtlaih i atanglei bangin thil sining a kan chimh.
Thawngthawngpa nih, “Kannih hi Puchong, Tesco sangah ummi kan si. December 18 ah a riak in Vanzang khua lengchuahnak ah kan kal hna. Keimah hi Thangzang khuami ka si nain kan nu hi Vanzang khua asi,” tiah a chim.
“A thaizing December 19 ah kan hung tlun ahcun kan thil vialte an rak leh dih. Tangka kan i fimmi kan zoh cu a um ti lo. RM10,000 leng an kan firpiak dih.
“Kannih hi fa 3 ngeimi kan si i fale damlo caan lakhruak hman awk ah tiin kan i khonmi te asi. Kan lungrawk tuk nain a tlau cangmi cu zei bang ti awk ṭha lo.
“Innka hi a baoh in baoh loin tawh in an on. Kan inn hi khaan 3 um. Coka ah namte an lak i innkhaan cu namte in an aon hna. Khaan 3 ningin thil vialte an chuah leh dih. Innkhaan cu an hrenhta ṭhan hna i tawh an i kalpi dih. Innka hram ah an zun an zunta fawn.
“Khaan dang cu an vanṭha, an tangka tam an firpiak hna lo.
“Kan inn ahhin minung 7 kan um. Kan dihlak in khua lengchuahnak ah kan kal dih i inn ah hohmanh kan um lo.
“Zaan 1 te leng kan va chuah tami zeitin dah an hngalh hnga, kan innka baoh loin zeitin dah tawh an on hnga, tbk pawl cu ka khuaruahhar ngai.
“Tesco sang ahhin Laimi inn baoh le tangka firpiak a um pah ṭheo. Liamcia kum tlawmpal zong ah kanmah Laimi Ronaldo te inn an rak baoh i RM24,000 leng an firpiak hna.
“Tutan ah vanchiat kan tonmi hi kan sangum kan Laimi hna i ralrinnak le an himnak ah cang hraam seh,” ati.
