US ram, Michigan state hrambunh Chin Community USA phu nih Thantlang innkaang bawmhnak caah phaisa a kawlpiak hna i $16,920 a hmuhpiak hna. Tangka cu a ning tein Texas state hrambunh Global Thantlang Relief Organisation sinah a pek cang hna.
Chin Community USA hruaitu Siangluai Mang nih, “Kawlram ralkap nih Thantlang khua inn 100 leng an khangh hrawh caah minung zeimawzat cu ramtang ah an zaam, adang zeimawzat cu ramri tan in ramdang tiang an zaam,” tiah Thantlang bawmhnak phaisa an kawlpiaknak hna aruang a chim.
“Hitin awlokchong harsa in a ummi hna bawmh hi Chin Community USA kan rian asi bang bawmhnak phaisa cu Facebook le adangdang in kan kawlpiak hna.
“Kan hmuhmi phaisa $16,920 cu December 28 ah Chin Community USA ngunkeng Mai Sui Siang nih Global Thantlang Relief Organization hruaitu Ni Cung Lian sinah check in a pek cang.
“Thantlang innkaang caah tangka a rak thawhtu kan member cungah siseh, hawikom dangdang cungah siseh, pumpak cungah siseh Chin Community USA nih lunglawmhnak bia kan rak chim.
“Lairam le Kawlram pumpuluk chungah remdaihnak um khawhnak hnga zumtu dihlak thlacam cio usih,” ati.
