Tang lam in Malaysia a ra Kawlrammi 18 cu nizaan tihni Ningani ahkhan Thailand ramri in Malaysia an luhka Pasir Mas khua ah palik nih an tlaih hna.
Kan hnu zarh zongah Pasir Mas khua ah Kawlrammi 64 an tlaih cang hna – mah hi hmet law rel khawh asi.
Nizaan tihni ah tang lam in Malaysia a ra Kawlrammi 18 an tlaih hna lio ahcun anmah phortu Malaysia rammi 2 zong an tlaih hna.
Palik bawi nih, “Myanmar rammi phorhnak caah an hmanmi motor ṭha taktak 2 le phone 3 zong kan tlaih chih,” tiah a chim.
“Motor le phone cu tangka RM165,000 man an si.
“Khuami nih a thli tein palik sinah thawng an kan thanh hnu ah, palik nih motor pakhat cu an kham i a chungah ramdangmi 8 an hmuh hna.
“A hnu ah rami motor pakhat an dirter ve i a chungah ramdangmi 10 an hmuh ve hna.
“Motor mongtu minung 2 cu Johor state ah khuasa mi an si. Anmah he an motor he an tlaih chih hna.
“Ramdangmi 18 cu an dihlak in Myanmar in a rami lawngte an si. Thailand he aa rimi Malaysia state Kelantan i Pasir Mas khua ah a thlithup in an lut.
“Myanmar rammi 18 cu pa 12 le nu 6 an si. Hohmanh Malaysia ratnak visa an ngeih lo caah kan tlaih dih hna.
“Motor mongtu 2 nih cun Johor state ah kalpi an timh hna. Johor state ah rianṭuan aa timmi an si men lai tiah kan zumh.
“Bia kan hal hna tikah, motor mongtu Malaysia rammi 2 nih cun phorh man minung 1 RM300 cio an lak hna.
“Motor mongtu 2 cu kum 24 le 34 an si. Myanmar rammi 18 cu kum 20 in 40 kar an si,” ati.
