Puaisa sinah tangka ting 30 hrawng cio liam in Malaysia a rami Kawlrammi 16 cu tuni ah Thailand in Malaysia an hung lut. An luh bakah palik nih an tlaih hna.
Thailand he aa rimi Malaysia ram, Kamppung Siram khua ah lam lo ramtang in thather lengmang in an hung lut. Kuala Lumpur lei ah kal dingin puaisa motor an hngah lio ah palik nih an tlaih hna hi si.
Kawlrammi 16 cu pa lawngte an si, tiah Malaysia palik nih an chim.
Tu zingka 8:50am hrawngah palik nih Thailand ram in a thlithup in a hung lutmi an um hnga maw tiin pawngkam an veh lio ah an hmuh hna.
“Kelantan state, Kampung Siram khua ah an hung lut. Phungninglo in lam lo ramtang in an hung lut tiah kan zumh,” tiah palik nih an chim.
“Malaysia luhnak visa an ngei lo.
“An dihlak in Myanmar rammi lawngte an si. Puaisa pawl nih state dang ah kuat an timh hna tiin kan zumh.
“Kum 17 in 40 kar an si. An hung luhnak kong hlat chap dingin le tazacuainak case tuahpiak dingin kan hren ko hna,” tiah palik nih an chim.
Hlan ahcun Malaysia ratnak caah puaisa nih Kawlram ting 7 hrawng lawng an rak lak nain atu cu Kawlram ting 27 hrawng an lak. Mah pinah, Kawlram in Thailand tiang bus man le rawl einak anmah tein an rinter hna i a tlawmbik ting 4 hrawng an dih chap caah a dihlak ting 31 hrawng a dih.
January le February atutiang ahhin Malaysia a ra Kawlrammi 200 leng an tlaih cang hna. Tlaih cangka in Kawlram an khirh colh hna lo. Malaysia upadi an buarmi man kum caan saupi vok bantukin thurhnawm le chiakha takin thong an thlak hna hnu ah an khirh hna.
