Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram ah kan Chin miphun thongsawm tampi riahruun le ei awk ngei loin harnak fakpi an tuar lio asi.
Cu kan unau ralzaam hna bawmhnak caah Mizoram in Lalbiakchhungi le Kimkima le New Zealand ram in nungak Van Hlei Sung nih Australia ram, Adelaide khuapi ah an awzai in phaisa an kawlpiak hna lai.
Lalbiakchhungi – Lairam na daw maw?
Chin ram um kan mino hna nih meithal he nunnak pek in ral an doh. Kan awṭha hna nih an awzai in ral an doh ve. Kannih Adelaide um Chinmi hna zong nih concert ticket cawk in kan ram caah ral do ve usih.
Nunnak kawl in a zaammi kan miphun thongsawm tampi kan unau Mizo nih an khua le ram ah umnak le tirawl an pek hna pinah an awṭha hna zong nih atu bantukin Australia tiangtiang ra in bawmhnak an hung kawlpiak hna. Australia um Chinmi vialte nih concert ah kal in kan miphun ralzaam bawm cio hna usih.
Kimkima – I zun ngaih Lunglen vangin
Concert tuahnak hmun le caan cu atanglei bangin si lai.
Acaan: 4pm – 9:30pm
Ani: Zarhteni (September 3)
Ahmun: Starplex, 18 – 20 Alexander Ave, Evanston park, SA 5116
Concert tuahnak hmun ah tirawl an zuar lai caah hohmanh rawl ei ta loin kal cio hna usih. Ticket a caw rih lomi zong nih a hmun ah cawk khawh asi lai.
Hi concert in hmuhmi phaisa vialte cu tuksapur harnak a tuarmi kan miphun ralzaam hna sinah a phan dih lai.
Van Hlei Sung – Dirṭi Caan Cu Cang Lo Maw?
Lai Ram Dawh
