Apoi tuk: Min Aung Hlaing cu ASEAN Meeting a kai lai

Uknak firtu Myanmar ralkap bawizik Min Aung Hlaing cu April 24 ah tuah ding ASEAN meeting ah an sawm ve caah Indonesia a tlawng lai, tiah Reuters media nih a thanh.

Min Aung Hlaing nih uknak a fir thok in tutan hi avoi 1nak bik ramdang a tlawn si lai.

Democracy nucan Pi Aung San Suu Kyi hruaimi mipi cozah cu ralkap bawizik Min Aung Hlaing nih February 1 ah uknak a chuh i duhlonak a langhtertu rammi 728 leng a thah cang hna.

Ralhrang bantuk a simi ralkap bawizik celngel ASEAN ram pawl nih Indonesia ram ah meeting kai dingin an sawm hi ‘nangmah hi Myanmar uktu na si’ tiin an cohlan he aa khat, apoi kho taktak.

ASEAN meeting cu April 24 ah Indonesia khualipi Jakarta ah tuah an timh. Min Aung Hlaing zong aa kai ve lai, tiah ASEAN hruaitu tampi nih an fehter cang, tiah Thailand Ramdang Vuanci Zung biachimtu Tanee Sangrat nih a chim.

Ralhrang ralkap uknak hrawh dingin April 16 ah an dirhmi Rammi Lungrualnak Cozah (National Unity Government – NUG) nih, “Min Aung Hlaing zaka ah kanmah kan sawm uh” tiin ASEAN cu an chimh nain ASEAN nih an duh lo.

Asia Nichuah Thlanglei Ram pawl Funtomnak Bu (Association of South East Asian Nations – ASEAN) ahcun ram 10;