Brunei ram ah tuah ding tu thla ASEAN meṭing ah Min Aung Hlaing kaiter lo dingin bia an chahmi cu uknak firtu ralhrang Kawl Ralkap Cozah nih, “Kan lungtling bak lo,” ati.
October 26 in 28 tiang khi Brunei ram ah ASEAN meṭing an tuah lai. Myanmar cu ASEAN chungtel asi ve bantukin kai ve ding asi nain liamcia thla 6 lio ah ASEAN nih Myanmar ram daihnak caah tuah ding bia 5 a rak chahmi kha Min Aung Hlaing nih a tuah duh hna lo caah ‘tutan meṭing kai hlah seh’ tiin ASEAN chungtel ram pawl nih bia an chah hi asi.
Atu lio ASEAN chairman a ṭuanmi Brunei ram nih cathanh a chuahmi ah, “Myanmar aiawhtu ding ahcun ramkheltu a si lomi Myanmar rammi pakhat kan sawm kaiter la,” ati.
Brunei Ramdang Vuanci nih, “April thla ah ASEAN nih Myanmar ram daihnak caah tuah ding bia 5 kan chahmi cu tuah dingin Min Aung Hlaing nih ka lungtling a rak ti nain atutiang a tuah hna lo pinah ralkap zuamcawhtu vialte tonnak nawl zong a kan pe lo,” tiah Min Aung Hlaing meṭing kaiter lo dingin ASEAN nih bia an chahnak aruang cu a chim.
“ASEAN chungtel ram pawl nih, Myanmar cu a ram chung buainak hi daihter hmasa sehlaw mah hnu lawngah kan kaiter te lai, tiin biatung an dirh,” ati.
Mah kong he pehtlai in Myanmar Ralkap Ramdang Vuanci Zung nih, “ASEAN meṭing ah a kan pheumi cu kan lungtling bak lo i fak piin kan duhlonak kan langhter,” tiah a chim.
“Myanmar pheu dingin an ceih lio le bia an chah lio ahhin ASEAN chungtel ram dihlak zong kan i tel lo caah ASEAN phungphai an buar,” ati.
Singapore Ramdang Vuanci Zung nih, “Tutan meṭing ah Myanmar kaiter lo dingin bia an chahmi hi a har ngaimi si nain ASEAN limhang caah a herh hrimhrimmi asi,” tiah a lungtlinnak a langhter.
“ASEAN palai he a rannak in rianṭuan dingin le biachahmi 5 kha a rannak in tuah dingin Singapore nih Myanmar cozah kan in forhfial,” ati.
