Aung La Nsang cu July 30 ah Singapore ah Brazil pa Ataides he aa phomh ding an si caah tuni ah Singapore ram a phan cang.
Tial Cung Thang nih a zulh. “Aung La Nsang (Myanmar Lim) he Singapore ah kan ra cang!!! Timhtuahnak ṭha tein kan ngei cang!! A taangmi cu Pathian kut ah a um cang,” tiah Tial Cung Thang nih a chim.
Aung La Nsang cu a World Champion taisawm 2 ningin Netherlands pa Reiner De Ridder nih a chuh hnu ah tutan hi avoi khatnak bik aa ṭhuat asi lai. A taisawm 2nk a chuh lio video atang ah zoh khawh asi. Aung La cu ngakchia tuah bakin a tuah ko.
A taisawm chuttu De Ridder a singkhaw khawhnak ding ahcun a dang pawl a tei hmasa hna a hau. Cucaah tutan ah Brazil pa Ataides tei hi a caah a biapi ngai.
De Ridder nih a tei vevemi an si
July 30 ah Aung La he aa phomh ding Ataides hi Aung La taisawm 2 ningin a chuttu De Ridder he aa rak phomh ve cangmi asi.
Kum 2020 February 8 ah an rak i phomh. An i tluk taktak nain De Ridder kha mi tlaih a thiam tuk caah a tei i si. An i ṭhuat lio video a tangah zoh khawh asi.
Aung La a sung hoi hnga maw?
Aung La cu De Ridder nih voi 2 ning tein fawi tukin a tei. Ataides cu De Ridder nih aa harh tuk.
Cun, Aung La nih Russia pa Bigdash voi 1 te a tei nain aa harh tuk. Bigdash nih voi 1 a tei ve. Ataides nih cun fawi tukin Bigdash a tei.
Mah pinah, Aung La cu thongh le chuih lawng a thiam i ṭuang ah tengh le tlaih a thiam lo. Ataides cu a thiam ngaimi asi.
Cucaah, Aung La hi Ataides nih a tei lai ti zumh a um ngai. Nain, ṭhuat ahhin van chiat/ṭhat a um ngai ve i ruah lo piin Aung La nih tei khawh zong asi ko.
Aung La maw na zumh deuh Ataides dah? Na ruahning comment ve…
Zohnak
Hmai zarh Ningani (July 30) zaan 8:30pm ah an i phomh lai. Minthang huaha lo pawl an i phomh hmasa lai i Aung La aa phomh cu a tlai pah te lai. Singapore caan 8:30pm cu Kawlram cun 7pm asi lai. Malaysia cu Singapore caan he aa khat ko.
ONE Championship Youtube channel ah free in live zoh khawh asi lai.
