Australia Chinmi Tamnak Victoria State cu Ni 20 Chung Bak COVID-19 Mizaw an Um Ti Lo

,

Australia ram ah Chinmi kan tambiknak Victoria state chungah COVID-19 zawtnak aa chawn tharmi an hmuh lonak ni 20 bak asi cang.

Malaysia le US cu zawtnak a karh taktak nain Australia cu a zor ngai cang.

Victoria state ahhin Chinmi 10,000 hrawng kan um. Tambik cu khualipi Melbourne ah kan um.

Tuni hi Victoria ah COVID-19 mizaw 1 te an hmuh nain ramdang in a rami asi. Victoria state chungah zawtnak aa chawnmi an um lo.

Atu hi Victoria state ah a zaw liomi (liamcia thla tlawmpal ah zawtnak an ngeih hmuhmi) 31 an um.

Australia Kakuaisi Kong

US hrambunh sii company Pfizer nih a sermi COVID-19 kakuaisi cu Australia cozah nih a ram ah hman dingin a cohlan cang.

Sii Tlangtlaknak Zung (TGA) nih kan rammi kum 16 cung minung caah hman dingin kan cohlan, tiah a thanh.

Australia ram ah hman dingin cohlan hmasa bikmi kakuaisi asi.

Pfizer company nih, “Australia cu February thla dongh lai hrawngah kakuaisi kan in kuat te hna lai,” tiin cozah a thanh.

Cucaah, February thla dongh lai hrawng silole March thla thokka hrawng cun Australia ah COVID-19 kakuaisi an chunh ve cang hna lai tinak asi.

Australia ram hruaitu PM Scott Morrison nih, “Pfizer kakuaisi cu minung 1 voi 2 cio chunh an si lai. Voi 1 chunh khawh in a tlawmbik ni 21 hnu ah voi 2nak chunh an si lai,” ati.

A hramthok ahcun hmaisuang in COVID-19 mizaw a thloptu pawl, tar le tar zohkhenh rianṭuan pawl papek in chunh hmasa an si lai.