CDF-Matupi ralkap Salai Sai Lian nih tuni ah ruah lo piin a kan liamtak.
Salai Sai Lian cu CDF-Matupi battalion 3 inn bomb lei a thiammi ralkap phu chungtel asi.
Matupi peng Thai Boi khua um ralhrang Myanmar ralkap sakhan pawngah bomb hmenhmi an kawl thianh lio ah bomb nih a puah i a nunnak liam hi si.
Atu hi Matupi pengah ral a fak tuk peng rih ko. January thla thokka in atutiang Matupi peng ah kahdohnak a fak peng. Ralzaam tampi an um cang.
“Ralhrang Myanmar ralkap 5 kan thah hna pinah, adang 10 leng kan hliamh chap hna,” tiah CDF-Matupi nih nizaan January 27 ah a chim.
“Matupi ralkap sakhan in aa thawhmi ralhrang pawl cu Matupi-Mindat lam mengtung 80 an phak lio January 26 zingka 9am ah kan kah hna i 5 kan thah hna pinah 10 leng kan hliamh chap hna hi si.
“Ralhrang Myanmar ralkap nih hriamnam ngan duhpaoh in an kah caah pawngkam khua chungah an tla puak hna.
“Khuate khuami le CDF ralkap pawl cu hliam tongmi kan um lo. Ralhrang pawl cu Mindat peng mengtung 70 lonh deuh an phan cang,” ati.
