Tuni ah Malaysia Chinmi 2 ruah lo piin rili ah an paam, tiah kan theih.
A nunnak liammi 2 hi Pu Van Biak Thawng (Hakha peng, Malsawm khuami) le Van Lian Cung (Hakha peng, Tinam khuami) an si.
Tu chun ah thaithawh an ei khawh in nuamhnak kan tuah lai an ti lio ah ti nih a dawh hna i an tlau hi si.
Christmas lai asi bang hawikom dawt hna he nuamhnak tuah (Christmas lengchuah) dingin Port Dickson rili ah an kal hna. Tuni hi a ni 3nk an caam asi.
Nizaan zongah Van Lian Cung nih an riahnak hotel salawng an remh lio ‘X’mas lengchuah’ tiin live a thlahmi atang video ah zoh khawh asi. Minung nunnak ngai hi…
Port Dickson rili (kaanche) cu Malaysia um Laimi kan kal lengmang nak asi ko nain nizaan chun hnu in tuni atutiang ruahpi sur peng caah ruah lo piin ti a lian tuk i a lak fanh hna hi si.
Anmah he nuamhnak a kal ṭimi pawl cu thinphang thlalau le tuksum in an um ko hna. An kawl peng hna nain rili thuhnak lei cun an kawl kho rih hna lo. Atutiang inn ah tlung loin an kawl peng rih ko hna.
A kal vemi Pu Biak Ceu Thang nih, “Atu nai cu pei thaithawh kan ei ti ko hna kha!!! Van Lian Le U Biak Ka zaanmang ko a lo ee. Minung kan nun caan kanmah tein kan i uk khawh lo tuk ning hi nanmah pahnih nih hin nan langhter eee… Chunhlan cu nuam taktak in caan nan kan hmanpi i zaan lei ahcun vawlei cungah a fak bikmi fahnak tuar ter in nan kan liamtak ruangmang eeee!!!!,” tiah a sian hna lonak kong a chim.
A cang liomi thil (breaking news) asi caah thawngpang thar um tikah kan bet chap lengmang lai. Nazi 1 dan in zoh ṭhan lengmang dingin kan in nawl.
