Singapore ram ah tuahmi Esports zuamnak ah Myanmar ram aiawh in aa zuammi Burmese Ghouls (BG) cu Grand Final ah a kai cang.
Hi zuamnak puai cu game alar takmi Mobile Legends Bang Bang nih a tuahmi a si. Zuamnak cu M2 World Championship tiin an auh.
BG nih Indonesia ram aiawh in aa zuammi RRQ Hoshi team cu 3-2 in a tei caah Grand Final ah a kainak hi a si.
M2 World Championship i Grand Final zuamnak cu thaizing ah an tuah lai i cutik ah winner a fiang te lai.
Game one le two ahcun Myanmar nih a tei. Game three le four ah Indonesia nih a tei tthan caah Game 5 an i celh chap. A puai 5nak ahcun Myanmar nih a tei.
Atu a tang rihmi RRQ, Bren Esports le Altar Ego (team 3) chung in teinak a hmumi le BG cu Grand Final ah aa tawng ding an si.
Zuamnak an kal hlan deuh te ahkhan Aung La Nsang zong nih, “Burmese Ghouls cu Myanmar ram cawisan ding ah nan i zuam ko lai ti ka zumh. Keimah le nan fan pawl nih kan in ttan pi ko hna,” tiah thapek nak bia a chimh bal hna.
