Chinland Defense Force – Matupi (CDF-Matupi) nih, “Ralhrang Kawl Ralkap 20 kan thah hna pinah adang 10 zong fak taktak in kan hliam hna,” tiah thawng a thanh.
Matupi khua um ralhrang Kawl Ralkap LID 304 le 140 phu ralkap pawl cu October 30 ahkhan Paletwa lei ah an kal.
Matupi in meng 6 hla hrawng an kal lio zaanlei nazi 6 ah CDF-Matupi hmenhmi bomb nih a puah hna pinah CDF-Matupi nih an kah chih hna.
“Cutin ralhrang Kawl Ralkap 20 hrawng an thi i adang 10 hrawng fak piin hliam an tong,” tiah CDF-Matupi nih thawngthanh.
November 2 zingka 9am zongah CDF-Matupi le Kawl Ralkap fak ngai in an i kap.
Kawl Ralkap pawl cu Matupi – Paletwa lam um Tuishit khuate ah an lut i meithal he miakpi he duhpaoh in an puah caah khuami vialte nunnak kawl in ramtang ah an zaam dih.
Kawl Ralkap 300 hrawng cu motor 83 in October 28 zaanlei 6pm ah Matupi khua an phan cang.
Mah ralhrang pawl hi Chin ram lak dingin Magway ramṭhen, Pauk le Kyaukhtu khua lei in a ra i October 12 ah Mindat khua a phanmi an si.
Mindat in Matupi lei an kal lio lam tanṭim ah CDF-Matupi le CDF-Mindat nih an kah lengmang hna i “20 hrawng kan thah hna pinah, 20 hrawng kan hliam chih hna” tiah CDF-Matupi nih a thanh.
“Kanmah CDF-Matupi lei cu hliam tongmi le thimi kan um lo.
“Ralhrang Kawl Ralkap pawl cu atutiang hi Mindat – Matupi lam um khuate pawl ah umhmun an khuar peng rih.
“An umnak khua paoh ah meithal he miakpi he duhpaoh in an puah. Inn an baoh, thil an fir, innzuat saṭhil vok le ar an thah ei piak hna.
“Mah ruangah sualnak ngei lo khuami 1,100 leng nunnak kawl in ramtang ah an zaam cang. Ramtang ah rawl le sii ai harsa ngai in an um hna.
“Matupi peng ralzaam pawl cu nihin tiang aho sin hmanh in bawmhnak kan hmu rih lo, tiah ralzaam pawl nih an chim,” tiah CDF-Matupi nih a thanh.
