Myanmar ralkap University a dihmi buci Kaung Thu Win le a chungkhar cu meithal le kuan tampi he CDF-KKG sinah an zaam.
CDF-KKG nih meithal le kuan man he aa tlak ningin laksawng tangka ting tampi a pek hna pinah a himnak hmun ah a thlah hna.
CDF-KKG sinah an zaam cu Decembere 23, 2021 ahkhan asi cang nain a himnak hmun ah an thlah khawh hna hnu, tuni lawngah zapi theih in CDF-KKG nih thawng a thanh hi si.
“Myanmar ralkap nih rammi a thahnawn hna ning a celh lo ruangah mipi lei ṭang dingin CDF-KKG kan sinah a hung zaam (CDM a tuah) hi si,” tiah CDF-KKG nih a thanh.
Buci Kaung Thu Win hi Chinram, Matupi pengah thlahmi Myanmar ralkap bawi asi. Nain CDF-KKG sinah a zaam lio hi Monywa ah ralkap ṭhialkamnak rian a tlaih lio si.
