CDF-Thantlang nih, “Khuahring Tlang ah Kawl Ralkap bawi pakhat telh in 17 kan thah hna,” tiah tunai ah thawng a thanh.
“Thantlang peng, Khuahring Tlang hmun kip ah June 8 thokin ralhrang SAC nih ralkap tampi a thlah hna caah tuni June 10 zingka 10am hrawngah CDF-Thantlang he kan i kap. Kan ral a simi ralkap bawi buci pakhat telh in 17 an thi.
“CDF-Thantlang lei cu hliam tongmi le a thimi kan um lo,” ati.
Cun, CDF an himnak hnga “CDF nih phungning tein thawng kan thanh hlan ahcun media pawl nih kahdohnak thawngpang thanh lo dingin kan in nawl hna,” ati.
Chin state thawngpang bultan
Hakha ah tlaihmi minung 61 an luat cang
June 5 ah Hakha ah uknak firtu ralkap cozah nih a tlaihmi minung 61 cu nizaan June 9 ah a thlah cang hna. A tlaihmi hna cu nu 35 le pa 26 an si.
June 5 ah Hakhathar um inn pakhat pawngah bomb a puak i Hakha mino 3 an nunnak liam. Aho puahmi si cu fiangin hngalh asi lo nain “CDF hi mipi nih huat hna seh tiin ralkap nih an puahmi si lai” tiah zumh asi.
Paletwa ah sianginn an khar ṭhan
Paletwa ah COVID-19 zawtnak a karh caah high school pawl an khar ṭhan hna, tiah Chin World nih a thanh.
“Chin state ah June 1 in sianginn an on hna i siangngakchia tambik an kainak Paletwa peng cu COVID-19 mizaw 10 leng an hmuh hna caah tuni in sianginn an khar ṭhan hna,” ati.
