Semnak Laitlang ah nunnek pek in ralkap uknak ṭha lo a dotu CDF-Zophei cu Malaysia um an unau Zophei tefa hna nih an si khawh chungin an bawmh ve hna.
Malaysia um Zophei tefa hna nih atutiang ahhin CDF-Zophei caah Malaysia tangka ting 1 le thong 13 leng (RM113,000 leng = Kawlram ting 500 le ting 50 leng) an thawh cang.
Kan hnu zarh February 2-5 kha CDF-Zophei caah phaisa kawlpiaknak bawlung puai CDF-Zophei Cup Malaysia an tuah i RM23,000 leng an hmuhpiak hna.
Zophei cu Thantlang peng um khuate 15;
- Leitak
- Aibur
- Hmawngtlang
- Hlamphei
- Vuangtu
- Zaabung
- Kuchah
- Congthia
- Ngalang
- Khuabung
- Hriphi
- Lawngtlang
- Tluangram
- Zephai le
- Phaikhua kawmh asi.
Tutan CDF-Zophei Cup Malaysia cu;
- Pa Bawlung Chuih
- Pa Volleyball le
- Nu Volleyball tiah zuamnak phun 3 an tuah.
Zephai nih bawlung chuih champion (laksawng RM1,500) le nu volleyball pahnihnak (RM300) a lak.
Hriphi nih nu volleyball champion (RM500) le Tluangram nih pa volleyball (RM500) an lak.
Khua 3 ningin an hmuhmi laksawng vialte CDF-Zophei caah an hlut dih.
Liamcia caan zongah Malaysia um Zophei tefa hna nih CDF-Zophei caah RM90,000 leng an rak thawh cang. Zophei khuakip an i telnak khrihfabu tumtlang Zophei Christian Fellowship nih RM23,000 a rak thawh. Hriphi khrihfabu nih RM7,000 le Zyphe Church nih RM5,000 tbk in adang Zophei khrihfabu pawl zong nih an rak thawh cio. Pumpak zongin tampi an thawh.
Atu lio cu Malaysia ah Zophei tefa 1,000 hrawng lawng an um cang nain kan miphun le ram nih hramhram uknak chungin luatnak hmuh khawhnak le federal democracy ram dirh khawhnak ding ahcun an zeizong an pek sian ti khawh asi.
Tu kum 2022 chung ahhin Malaysia tangka ting 2 (RM200,000 = Kawlram ting thong 1 leng) thawh rih dingin timhtuahnak an ngei.
US, Australia, Malaysia tbk ramkip um Zophei tefa hna nih CDF-Zophei caah tangka an thawhmi dihlak hi ni kum November thla tiangah ting thong 17 leng asi cang. Ni kum dongh tiang an thawhmi dihlak cu ting thong 20 (K 2 billion) hrawng asi.
Tu kum 2022 chung ahhin ni kum nak tam deuh, ting thong 30 in ting thong 40 kar hrawng an thawh rih lai tiah zumh asi.
