Ralhrang ralkap bawmtu Chinmi 4 cu Chin Concerned Youths timi Chin mino phu nih “Chin mipi a kan rawitu kan ral nganbik an si” tiah a thanh.
Ralkap hriamnam, mipi rawitu pawl cu Chin mino nih zungzal in zungzal tiang kan hlawt hna i kan doh peng hna lai.
Bu dang pawl zong nih ral nganbik pawl hi dantat hna ulaw hrial cio hna uh, an ti.
1. Dr. Ngun Cung Lian cu sualnak ngei lo rammi zalam cungah a hrem i a thattu ralhrang ralkap ruahnak petu asi.
2. U Maung Ha cu ralkap cozah chungtel asi. Chin tuanbia ah mi roling Pu Vum Thu Maung fapa asi. A pa Pu Vum Thu Maung (tleicia) cu Mindat peng Vum Thu khuami asi i kum 18 asi lio ah Mirang ralkap a lut.
Nain, ramchut Mirang pawl thil tuahmi pawl doh dingin Mirang ralkap in a chuak i Mirang raldo a thok. Chin state thlanglei Chinmi pawl a khawmh hna i Chin Miphun Lungrualnak Phu a dirh i ramchut Mirang pawl cu fak piin a doh hna. Kum 1940 February 20 ah Kanpetlet khua ah Mirang duhlo langhternak a rak tuahpi hna caah Mirang nih an rak tlaih. Vawlei Ral 2nak lio zongah Chin Tlangmi Luatnak Ralkap a rak hruai hna i Ralbawi Aung San he Kawlram luatnak caah Mirang an rak do.
Mirang uknak in luatnak kan ngah hnu ah, Chinram uktu bawi a ṭuan hmasa cemmi asi. Amah hruainak in Chin state cu ralbawi uknak in democracy uknak ah a thlen i Chin Miphun Ni zong a thok.
Mah tluk Chin mi roling, kan khualipi Hakha certual hmanh amah min kan i sakmi Pu Vum Thu Maung fapa nih Chin miphun a kan rawi cu lung a fak ko.
3. Pu Ngun San Aung cu tangka le bawi a duh caah ralhrang ralkap tapeh a ṭuan. Ralhrang ralkap nih Chin state mipi hremnak caah a orhlei kut bantukin a hmanmi si.
4. Pu Kyaw Nyin cu ralkap vorhlei kut Pu Ngun Sang Aung kut tangah a ṭuanmi si.
