Singapore ram ah sinum rian a ṭuanmi Chin ngaknu Piang Ngaih Don, kum 24 cu a boss nu nih a thah.
Singapore a boss nu nih, “rawl ei ter loin buhri lakin ka hrem, ka tukvelh i ka thah beh,” tiah biaceihzung ah aa phuan.
Singapore ram ah sinum rian ṭuanmi 250,000 hrawng an um i hrem an tong pah cio hna nain Piang Ngaih Don nih a tonmi hi a chiakha bik si, tiah Singapore media pawl nih an ṭial.
Piang Ngaih Don a boss nu nih a tuahto ning hi cu fihnung bak asi. Ṭuang ah a ke in a lamhcil, thaw chuah kho lo tiangin a hrom dih, hmunphiah in a tuk, darlin in a khangh.
A boss nu cu a min ah Gaiyathiri Murugayan, kum 40 asi. Sualnak 28 in taza an cuaimi cu ‘ka palh ko’ tiah aa cohlan dih. Zei tiang dah thong an thlak lai ti cu hnu ah an ceih ṭhan te lai, nun chung thongthlak a tong kho men.
“Minung fa rumro hi tluk tuksapur le minung fa lo bantukin hrem le thah hi cu thil dik dirpitu biaceihzung nih tuar khawh ding asi lo, cucaah a fak bik dantatnak inter uh,” tiin tazacuaitu cozah sihni pawl nih biaceihzung an hal.
Chin ngaknu cu kum 2015 ahkhan Gaiyathiri le a vapa (palek) nih kum 4 an fanu le kum 1 an fapa zohkhenh dingin sinum rian an ṭuantermi si.
Nain, Chin ngaknu cu ni fatin ngawt i a tukvelh i a hrem peng, a caan cun ni 1 ah voi tampi a tukvelh i a hrem. A caan cun anu (kum 61) he an tukvelh ṭi.
Chin ngaknu cu kum 2016 July thla ahkhan Gaiyathiri nih ngol loin suimilaam tampi chung a velh i a thi beh.
Kum 1 chung an sinum a ṭuan chung hi rawl zong ṭhaṭhi an eiter lo. Innkaa on buin ti an kholhter.
Zaan ah suimilaam 5 chung lawng an ihter. Mah ruang cun kum 1 chungah a der dih cikcek i a khing 38% hrawng a zor. A thih ahhin 24kg (52 pounds) lawng asi. Kum 24 minung 24kg lawng si cu khuaruahhar lei si.
Sinain, Singapore nu cu ‘lainawn’ case taktak si loin ‘thah sual’ case tuin taza an cuai. Thah hramhram (lainawn) case cu Singapore ram ahcun thihdan pek (cozah nih thah ve) khawh asi. Atu cu “thah sual” case in taza an cuai caah a fakbik “nun chung thongthlak” khawh asi.
A vapa zong case tam nawn in taza an cuai ve.
