Chin ralkap (CNA, CDF – Matupi, CDF – Zotung le CDF – Lautu) nih Myanmar ralkap 60 hrawng an thah hna, tiah kan theih.
Matupi pengah rang sii i chun in raldoh aa thawhmi Myanmar ralkap 100 hrawng cu Chin ralkap phu (CNA, CDF – Matupi, CDF – Zotung le CDF- Lautu) nih an kah hna i 60 hrawng an thi, 40 hrawng lawng an luat, tiah CDF ralkap Salai Naing Hung nih a chim.
Ṭih theih lo le ṭhawnnak caah rang sii an i chun ti asi
“A tangmi uico ralkap pawl cu ramtang ah an i tap i lungfim huaha loin lam an tlau.
“A ra laimi ni tlawmpal chung cu Matupi pengah ral a fak chinchin kho men,” ati.
Nizaan zongah meithal i put in ralram an kal lio hmanthlak a tar i, “Aa ka daw taktakmi thla rak ka campiak cio ulaw,” tiin a tial.
Myanmar ralkap nih nizaan tihni ahkhan Magway ramṭhen, Kyauktoo khua in ralkap motor 90, tank 2 le helicopter 1 in ralkap tampi a thlah hna.
Mindat khua an lonh cang i zahan zaan ah Mindat – Matupi lam mengtung 23 ah an riak i tuni hi Matupi lei ah an kal cuahmah liopi asi.
Mindat – Matupi lam thluan ah CDF-Mindat, CDF-Matupi (battalion 1) le CDF-Dai nih an pel cuahmah ve hna.
Matupi khuapi ah umhmun khuarmi Myanmar ralkap battalion 140 phu pawl cu Matupi peng khuate tampi ah Chin ralkap nih fak tukin an kah cuahmah hna caah bawm dingin hi zazat ralkap an thlah hna hi si.
Matupi peng, Kace, Tipaw le Kihlung khua 3 cu Myanmar ralkap nih an luhhawh caah khuami a thong leng ramtang ah an zaam.
Khuami 10 an tlaih thah cang hna. Cheukhat cu an ruak hi voi tampi in an tan cik dih. An thah hna ning a chiakha taktak.
