Chinram Runvennak Ralkap (Chinland Defence Force – CDF) kan dirh, tiah April 25 ah thawng an thanh.
“Buai lo tein sandahpiahmi mipi ralkap cozah nih nan tlaih, tukvelh le thah hna pinah, CDM a tuahmi cozah rianṭuan le an chungkhar pawl zon nan tlerh hna, bia nan hal hna, mipi rawl a phormi nnan kham hna, khualtlawngmi nan kham hna i tangka nan hal hna.
“Chinram chungah nan tlaihmi hna pawl hi a rannak in thlah hna uh. Mipi hnahnawhnak nan pek rih hna ahcun Chinram Runvennak Ralkap (CDF) nih a phunphun in kan in doh hna lai,” an ti.
“CDF cu April 4 ah kan dirh. Phungninglo in uknak chuttu ralkap cozah nih dai tein sandahpiahmi pawl, CDM tuahmi cozah rianṭuan pawl le sualnak ngei lo mipi a phunphun in hnahnawhnak a pek hna, a tlaih hna i a thah hna caah mipi veng dingin kan dirhnak asi.
“Chin state peng 9 le state leng um Chinmi hna nih kan dirh.
“Ralkap hremuknak a hram bongh dingin Rammi Lungrualnak Cozah le aa pehtlaimi phu pawl he i bawm in rian kan ṭuanṭi lai.
“Chinram chung biaceihnak, upadi sernak, himnak le uknak kong ahcun Chin Act upadi le Chin nunphung kan kan hman lai,” an ti.
CDF he cun Chin ralkap phu 5 an um cang tinak asi:
- Chin Miphun Ralkap (CNF/A)
- Zomi Dothlennak Ralkap (ZRA)
- Kuki Miphun Ralkap (KNA)
- Chin Miphun Runvennak Ralkap (CNDF) le
- Chinram Runvennak Ralkap (CDF).
