Chin state ah Tang 10 camipuai phi ding aza lawng an si lai

Chin state ahcun sianginn an on khawh lo caah tu kum Tang 10 camipuai phi ding an um huaha lo, kum dang ah minung thong tampi an si tawnmi kha tu kum cu aza hrawng lawng an si lai, tiah State Fimcawnnak Zung sin in kan theih.

State Fimcawnnak Zung bawi U Bi Ko Du nih, “Chin state ah Tang 10 camipuai phi ding cu Paletwa peng ah tlawmpal an um lai. Matupi zong lawlawse minung 100 hrawng an um lai. Hakha an um lo. Falam ah 20 hrawng an um lai. Tedim cu min cazin an kan pe kho rih lo. Tonzang zong an tam lo. Hakha, Thantlang, Mindat le Kanpetlet cu sianginn kan ong rih hna lo i an um lo,” tiah a chim.

Tang 10 camipuai cu March le April thla chungah phit asi lai, tiah Rampumpi Fimcawnnak Zung (uico ralkap) nih a thanh. Tang 10 camipuai phit a duhmi nih January 15 tiang sok khawh asi lai, tiin caan an sauhpiak hna.

Chin Fimcawnnak Bawi U Bi Ko Du nih, “Camipuai phit sok caan kan sauhnak aruang cu atu lio humhimnak boruak ruang, thawngpang a thei lomi ngakchia an um sual lai ti phan ruang ah asi,” tiah a chim.

“Atu lio buainak ruangah Thantlang, Mindat le Kanpetlet peng ahcun sianginn kan ong kho rih lo. Hakha hi a him deuh ko ti zong pulrai ruangah on awk ṭha rih lo,” ati.

Chin state ahhin kum fatin Tang 10 camipuai phimi thong 10 leng peng an si. Nain rampumpi ah kum fatin cathiam lo bik (Tang 10 awng tlawmbik) state asi zungzal. A phimi 100 chungah 8 (thong 10 chungah 800) hrawng lawng an awng tawn.

Ref: Chin World