Khrihfa kan caah a sunglawi tukmi Christmas puai pi cu Chin state khuapi tampi ah kan tuah kho lai lo, tiah Chin pastor te nih an chim.
Chin state khua tampi ah ral a thawh pinah kan mipi thongsawm tamtuk liangluang nunnak kawl in ramtang an zaam caah a ra laimi December 25 cu Christmas puai kan tuah kho lai lo, an ti.
Jesuh khrih chuah lawmhnak puai cu Khrihfa vialte nih December 25 ah sunglawi taktak in tuah cio asi. December 25 zingka ah chungkhar le cingla rawl hrawmnak tuah, khat le khat laksawng i pek, tbk in nuam taktak in tuah tawnmi asi.
“Tu kum cu Chin state ah uknak firtu Myanmar ralkap nih inn tampi duah hrawhpiak kan ton caah kan unau tampi nunnak kawl in ramtang ah an zaam hna. Hi tluk harnak an ton lio ah nuam ngai in puai tuah le sa ei cu kan siarem lo. Cucaah kannih Hakha cu Christmas kan tuah lai lo,” tiah Hakha Khrihfabu Kip Fonh Secretary Rev. Dr. Steven Lian Hup Ling nih a chim.
“Hakha khua lawng si lo, Hakha peng kan member khrihfabu vialte hohmanh Christmas an tuah lai lo. Kan unau hna hi tluk harnak an ton lio ah kannih vialte nuam ngai in puai tuah le sa ei cu asi kho lo.
“Nuamhnak le sa einak puai tuah loin, harnak tong kan unau hna caah thlacamnak le a nunnak a pemi hna upat peknak tu kan tuah lai,” ati.
Kanpetlet khuapi le a peng vialte zong Christmas puai kan tuah ve lai lo, tiah hruaitu pawl nih an chim.
Kanpetlet peng CDF le Myanmar ralkap i kah ruangah khuami tampi ramtang ah ralzaam dirhmun in an um hna.
Mindat zong an tuah lai lo. “Mindat khua ahcun minung hmanh an um ti lopi,” tiah hruaitu pakhat nih tuah an timh lonak kong a chim. Mindat peng cu Chin state ah kahdohnak a chuah hmasa biknak le a fah biknak asi.
Thantlang khua zong an tuah kho lai lo. Tuah cu chim lo khuami dihlak (thong 10 hrawng) cu September thla ah pawngkam khuate le India ram (Mizoram state) ah an zaam dih cang. Myanmar ralkap nih inn 500 deng an duah hrawh cang i khuami an kir zongah umnak inn an ngei ti hna lo. Biakinn 20 hrawng zong an khangh.
