Malaysia um Hakhalay khua chairman Salai Ral Lian Kap nih, “India ram ah ummi Chin11News nih kan khuami a thi lomi rumro a thi tiin Facebook group kip ah a tar caah khuami kan lungfak ngai,” tiah The Chin Express ah a chim.
“Pu Sum Lian Thawng hmanthlak a tar i RIP tiin a ṭial. Kan Laipa ralhrang nih an kah ṭhan. Ralhrang nih kan umnak cia ah ra in an kan thah lengmang ko… tiin a ṭial.
“Pu Sum Lian Thawng hi kan khuami asi. A thih lo pinah ralkap zong nih an kap lo.
“Facebook a tarnak ah kan khuami asi, a thi lo tiin comment zong kan ṭial len ko nain atutiang a delete duh lo.
“Chin11News tuahsernak hi Pu Sum Lian Thawng le a chungkhar upat lo le Hakhalay khuami zeirel lo asi. Kan lungfak ngai.
“Chin11News nih Facebook group kip ah na tarmi vialte a rannak in delete dih law tu hnu ah hi bantukin a si lomi rumro an hmanthlak tar in a thi tiin ṭial hmang ti hlah tiah ralrin kan in pek.
“Pu Sum Lian Thawng hmanthlak hi na delete dih lo ahcun India um Chin upa pawl sinah na min le khua kan hlat lai i Kawlram ah siseh, India UNHCR zung ah siseh a herh ningin hma kan lak lai, tiah kan in theihter,” ati.
