Russia nih Ukraine tuk a thok ni nizaan February 24 ah China ralkap vanlawng 9 bak ramri lonh in Taiwan ah an hung lut. Taiwan ralkap vanlawng in an va zuan hnawh colh ve hna i an kir.
Taiwan cu China nih “Ka ram asi” ati peng i liamcia kum 2 chung ahkhan voi tampi ramri lonh in Taiwan ram chungah ralkap vanlawng in a va zuan hnawh lengmang. Sinain, Taiwan ram (khua umnak) tiang cu an zuang bal lo, ramri hrawnghrang tiang lawng an zuang tawn.
January 23 zong ahkhan China ralkap vanlawng 39 bak nih ramri tiang Taiwan an va zuan hnawh. Mah hnu in atutiang hi vanlawng tlawm deuh in an va zuan hnawh peng caah ‘China nih ram chuh dingin an kan kah lai’ tiin Taiwan mipi le cozah an lungrethei ngai.
Nizaan ah Taiwan a kan tlerhmi China ralkap vanlawng 9 cu J-16 vanlawng 8 le Y-8 vanlawng 1 an si, tiah Taiwan Ralkap Vuanci Zung nih a thanh.
“Taiwan ramri chung a simi Pratas Islands cungah an zuang.
“Taiwan ralkap vanlawng in kan va zuan hnawh ralrin pek hna i an kir,” ati.
Russia nih Ukraine a tukmi hi Taiwan nih thinphang taktak in a zoh peng. Mah lio hin China nih a kan tuk lai ti a phang tuk.
Taiwan cu atu hi voi dang nakin ralring deuh (timhcia deuh) in a um.
China nih, “A herh ahcun Taiwan cu ralkap thazaang in ka lakte lai,” ati peng i US nih Taiwan sinah hriamnam a zuar fatin thi dengin a zai peng.
China Ralkap Vuanci Zung biachimtu ralbawi Pu Tan Kefei nih nizaan zingka ah, “Taiwan cu China caah a biapi tuk hringhranmi asi caah ramdang nan i thlak cun kan duh bak lai lo,” tiah media in thawngthanh.
“Taiwan hi China caah a biapi tukmi si caah China nih a zohsawh lo ti hi US theihter kan duh. China ramchung kongah US i thlak hlah, Taiwan kong ahhin mei dek hlah (an kangh lai),” tiin US cu ralrin a pek.
