Thailand Ngandamnak Vuanci Zung nih, “Ngandamnak rianṭuan 600 leng cu China sermi COVID-19 raikhamsi Sinovac voi 2 cio an i chun cang ko nain COVID-19 in an zaw,” tiah nizaan ah a thanh.
Hiti ning cun China sermi raikhamsi voi 2 chunh lawng a za lo ti a fian caah UK sermi AstraZeneca kan chunh ṭhanh dih hna lai, ati.
April in July karlak ah Sinovac raikhamsi voi 2 cio aa chun cangmi ngandamnak rianṭuan 677,348 chungah 618 cu COVID-19 zawtnak hrik an ngei. Nurse 1 cu a thi i adang pakhat zong thi dengmang dirhmun in a zawt lio asi.
“Ngandamnak rianṭuan pawl cu voi 3nak chun ṭhan hna uh tiin thiamsang pawl nih ruahnak an kan cheuh,” tiah ngandamnak bawi Sopon Iamsirithawon nih media sinah a chim.
“Voi 3nk cu China sermi kan chun ti hna lai lo. UK sermi AstraZeneca asiloah US sermi mRNA (Pfizer asiloah Moderna) kan chunh hna lai. A rauh hlan ah mah raikhamsi pawl cu Thailand an phan lai,” ati.
Atu hi Thailand ram cu COVID-19 zawtnak a karh taktak liopi asi. Ni fatin mizaw thong 9 hrawng peng an hmuh hna.
Thailand cu US President Joe Biden acozah nih tu thla dongh lai ah Pfizer raikhamsi 1.5 million hlut a timh. Anmah te zongin Pfizer raikhamsi 20 million an cah cang nain October thla hnu lawngah a phan te lai.
Indonesia zongah Sinovac raikhamsi aa chun cangmi ngandamnak rianṭuan 130 leng an thi cang. Indonesia cozah nih “Ngandamnak rianṭuan vialte cu US sermi Moderna raikhamsi kan chunh ṭhan dih hna lai,” ati.
