Biak Tha Hlawn cu Chinmi nih kan kai khawh bal lomi vawlei cung university ṭha bik 2nak Stanford University nih a cohlan pinah scholarship zong a pek chih. Chinmi vialte caah lunglawmh awk taktak asi.
US ram, Milwaukee khuapi um Biak Tha Hlawn cu Stanford University le Yale University ah kai dingin a sok i a pahnih ning bakin a ngah, i Stanford University aa thim hi si.
Hlawn cu an khua um Reagan High School ah a kaimi si. A naule 4 ca a zohpi pah hna caah aa manh lo ngai nain high school a awnnak mark sang taktak, GPA 3.9 (Grade A) a ngah. Kawlram he tahchun ahcun mark 90 cung lawngte in kungṭhu a hmuh dih tinak si.
Hlawn nih, “Midang caah santlaimi si ka duh. Hrem tongmi hna, mi nih zei rel lomi hna le mi nih a tuarnak theihpiak lomi hna caah chimrel piaktu si ka duh,” tiah a saduhthah a chim.
Stanford University ahcun Ramdang Pehtlaihnak (International Relations) cawn aa tim.
Hlawn cu liamcia kum 11 lio 2008 ahkhan Malaysia a phan i kum 2 hnu 2010 ah US a phan.
US a phak ka ahcun Humboldt Park School ah a kai i Mirang holh a thiam lo, nain saya/ma te nih lung dong lo tein an rak chimh peng.
“Lungsau tein an rak ka bawmh. Keimah zong, mi nih an chimmi i fian le mi he i chawnh khawh ka rak duh tuk ve,” tiah a phak ka ah fak piin aa rak zuam nak kong a chim – aa zuamnak thawngin, Tang 2 a kai ahcun ca a thiam tuk cang.
“Stanford University kai dingin an ka cohlan cu kaa lawm tuk hringhran, nain atu lio ka chuahkehnak Myanmar ram boruak ruangah i lawmh tuk zong hi ka siarem lo. Kan rammi hna hi tluk an tuar lio ah kai lawmh tuk caah ka sia rem lo,” tiah a chim.
Chin mino hna caah thazaang petu si a duhnak kong zong a chim.
“Chin mino hna nih an ka zoh tikah thlalang bantukin i hmu hna seh ti ka duh: keimah bantuk pei asi ko hi, mah buin Stanford University a kai kho ko. Ziah keimah zong ka kai khawh ve lai lo? tiin an caah lungṭhawnnak le thazaang laknak si ning ti ka duh,” tiah a chim.
