April 5 ah Chinland Defense Force (Zotung) kan dirh, tiah nizaan April 30 ah thawng an thanh.
Ramchung hriamtlai phu an thazaang dernak hnga lo le lungrual lonak a chuahnak hnga lo, CDF (Zotung) nih cun kan Chinram um hriamtlai phu CNA/F hi kan lu asi tiin kan cohlan, tiah cathanh an chuah.
Dothlennak a tuahmi dang pawl he kan i bawm lai i, federal democracy ram ngahnak caah kan ral simi ralkap cozah le anmah bawmtu pawl hi an hram kan bongh hna lai, an ti.
“NUG cozah hruainak hi kan zulh lai i federal democracy ngah a duh vemi dothlennak phu pawl he i bawm in ralkap cozah hi a phunphun in kan doh lai.
“CDF Zotung ralkap le chungtel pawl cu dothlennak a dih tik ahcun ralkap in chuah i mahle duhmi cio tuah khawh asi,” an ti.
CDF cu Mindat, Matupi, Paletwa, tbk Chin state peng dang zongah an dirh thluahmah cang hna.
