Chin state, Falam peng, Weibula khua ah Myanmar ralkap pawl cu an sakhan tiang kan dawi hna i 15 kan thah hna, tiah Chin National Defense Force (CNDF) nih a thanh.
“Zahan January 11 zingka 9am ah Weibula khua pawngah CNDF nih kan hmenhmi bomb i lamh in Myanmar ralkap tlawmpal an thi i tampi hliam an tong.
“Hliam tongmi an tam tuk caah an kan kap ngam lo i an zaam. CNDF nih kan dawi hna i an sakhan tiang kan kah hna.
“Myanmar ralkap sakhan cu zaanlei 2pm hrawngah CNDF nih ka kah hmasa i ralhrang 15 leng an thih pinah tampi hliam an tong,” ati.
Weibula khua pawng ahhin ral a fah ngai lio asi. January 6 ah ralhrang 100 hrawng an ra i mipi cheukhat zong ralram phaw caah an i kalpi hna.
Mindat ah Myanmar ralkap nih khuami pakhat an thah
Mindat peng ah Myanmar ralkap bomb a tlolhmi a puak i tarnu pakhat a thah pinah adang pakhat zong hliam a tong.
Mindat peng, Khui Ring khuate ah zahan zaanlei 2:15pm ah Myanmar ralkap nih an rak kah nain a tlolhmi bomb a puak.
Kum 60 hrawng a simi khuami tarnu 1 a thah pinah kum 30 hrawng simi nu pakhat zong hliam a tong.
A liamcia August 23 zongah Khui Ring khuate ah Myanmar ralkap an rak lut i phungki sianginn/biakinn le mipi inn an baoh hrawhpiak dih hna.
Mipi rawl le man ngei vialte an rak firpiak dih hna.
Mindat peng ahhin Myanmar ralkap hmenhmi bomb i lamh sual in Chinmi tam tuk an thi cang.
