Chin Miphun Ralkap (CNF) Chairman Pu Zing Cung nih, “ramdang ralkap an ra lai i a kan bawmh lai timi kha cu ruat hlah uh, zei tik hmanh ah an ra lai lo,” tiah a chim.
CNF Chairman Pu Zing Cung cu nizaan kha US ram Indianapolis khuapi um Chin Christian Church ah ‘Myanmar ralkap nih mipi uknak an chuhmi kong’ biachimnak a ngei i atu bantukin a chim hi si.
“A hlan bantukin kan ṭhu lai i amah tein cang ko lai tiin Chin mipi um sawh awk kan ṭha ti lo.
“A ṭuantu cu kanmah (mipi) kan si, kanmah kan ṭhut ko ahcun hohmanh nih an ṭuan lai lo.
“Ramdang an ra lai i … ti bantuk kha cu zeitik hmanh ah rak ruat hlah uh, zeitik hmanh ah an ra lai lo. Ramdang nih a kan bawmh lai, UN an lut lai, ralkap an lut lai timi cu nan lungthin chungah hloh cang uh.
“A ṭuan tu ding kanmah kan si, a tuahtu ding kanmah kan si. Kanmah nih kan thlen hau timi kha ruat uh.
“Cu kan tuahmi le kan ṭuanmi cung tu ah vawlei cung an rak i fu te lai. Kan ṭuan hmasa lo le kan tuah hmasa lo cun an i fu kho lo.
“Cucaah kanmah bak nih kan ṭuan lai ti kha nan lungthin chungah um seh ti kha kan sawm hna. Bawipa nih kan Chinmi cungah thluachuahnak kan pekpiak hraam seh,” ati.
Atang video ah a chimmi tling tein zohngaih khawh asi
