Chin Miphun Ralkap (CNF) General Secretary Salai Thla Hei nih, “Rammi Lungrualnak Cozah (National Unity Government – NUG) he federal army dirh kan i zuam cuahmah,” tiah a chim.
“NUG nih Ralkap/Runvennak Vuanci Zung zong a dirh cang. Federal Army ser ding hi kan saduhthah asi i tampi kan i tel khawhnak dingah kan i zuam cuahmah.
“CRPH he kan i ceih tik zongah ‘nitlaklei paoh cu CNF nih ṭuanvo la uh’ ti an kan duh.
“CNF nih hmunhma kan tlaih khawh lebang ahcun Kawl pawl hmanh kan sinah tampi tinṭan kai an duh. A thongthong in an duh.
“Cucacun, atu lio caan hi cu a biapi tuk. Hlan lio kum 70 chung cu dothlennak kan tuah kan ti le tlangcung miphun umnak ramri lawngah kan i kap. Ramri cun i kap len hmanh usih law Naypyitaw hrawnghrang kan phanh khawh lo cun an zeihmanh poi lo.
“Cucacun, tutan cu i kahnak um tikah ciammam deuh in i timh hau kan timi cu Kawl pawl zong rianrang tein tampi tinṭan pek an hau. Federal Army an ti lengmang tikah; Chin, Kachin, Karen, Shan, tbk army kan ngei dih cang. Kawl lawng nan ngei lo, a rannak in army ser zokzok uh kan ti hna le tu hi ser lo awk ṭhat ti lo caah an i tim thluahmah.
“Tinṭan kainak hmun ah Kawl pawl thong tampi an phan cang. Atu hi minung zong an i khawm thluahmah rih. CRPH silole NUG nih a pom hna i tangka tampi an kawl thluahmah cun, hriamnam tampi an kawlpiak khawh ve hna ahcun kum 70 chung tlangcungmi lawng nih kan dohmi kha Kawl pawl zong an i tel ve cang lai. Kan dihlak kan i tel dih hau.
“Kahnak a chuah tikah ramri lawng cun asi kho ti lo. Yangon, Mandalay, Naypyitaw ah zeitin dah kan luh khawh lai ti bantuk zong timhtuah a hau dih. Anmah zong cu lakhruak in tlik pah in an si tikah i timhtuahnak caan tlawmpal ngeih an hau.
“Chin miphun caah cun atu hi caanṭha bik asi caah rianrang tein hriamnam kawl zok le minung kan i khawmh zokzok hau kan timi cu mah vialte hi a thlaam pi zohchih in kan dihlak cawlcanghnak caah kan i timhtuahmi si. Federal Army zong cu aa tel kho rih lomi nih i tel khawhnak dingin i zuam cuahmah asi.
“Vice President zong Kachin asi, Prime Minister zong Karen asi. Tlangcung miphun hriamtlai phu pawl tampi kan i tel khawhnak hnga nanmah zong nih kan zuampiak uh kan ti hna.
“Mah vialte a tlamtlin i kan ṭhawn tuk hmanh ah, ni 1 ni 2 ah a dih lai ti cu ruah lo a hau. A tlawmbik kum 1 kum 2 cu a rau ko lai.
“Kawl ralkap pawl nih le atu an cawlcanghmi khi zoh ulaw lam dang an ngei ve ti lo. An i tuah sual laklawh, khuai aa sawh sualmi bantuk an si cang le ngol awk le an ṭha lo le an hriamnam vialte chuah hau ve cang. An thil ti khawhnak vialte chuah hau ve cang. An raltuknak vanlawng vialte chuah hau. An bomb vialte hman hau ko. Cu dirhmun ahcun kan phan.
“Kannih nih le CDM zong thazaang kan pek, ralkap pawl kan doh laklawh fawn cang ṭung le Chin miphun kan dirhmun zong in thim ding lam dang kan ngei ve hlei ti lo.
“Sinain, kan miphun himnak bik lam asi fawn dingmi le kan duhmi thlennak a chuah khawh fawnnak ding kha kap 2 in zoh chih kan hau. Cun caan sautuk hngah awk a ṭha fawn ti lo. Caan sau deuh kan hngah ahcun kan thazaang a zor chin lai ti zong phan asi.
“Hngah tuk awk a ṭhat lo bantukin, timhtuahnak ngei loin cawl thluahmah awk zong a ṭha lo. Mah 2 hi zohṭi thiam ngai a hau, cutin cawlcangh thluahmah a hau,” ati.
