Chin National League for Democracy (CNLD) party nih ralkap sawmnak a cohlangtu “Pu Kyaw Nyin cu kan party vice chairman 4 le chungtel sinak in kan phuah cang,” tiah tuni ah a thanh.
Pu Kyaw Nyin cu 2020 November 8 thimnak ah CNLD party in Paletwa peng Pyithu Hluttaw MP aa rak cuh nain a sungmi si.
Ralkap nih hramhram in uknak an fir hnu ah cozah an dirh i an kuttang rianṭuantu dingah an sawmmi cu a cohlan i atu hi Hakha ah zungkai aa thawh cang.
CNLD nih, “CNLD Vice Chairman 4 a simi Pu Kyaw Nyin nih party vice chairman sinak le party member sinak in chuahnak nawl cu February 16, 2021 ah a kan hal caah a kan hal ni ah kan phuah,” tiah tuni ah thawng a thanh.
CNLD chairman Pu Ngai Sak cu ralkap nih Chin state uktu rian (State Administrative Council Chairman) ṭuan dingin an sawm nain “mipi nih duh lomi cozah sinah rianṭuan ka duh lo” tiin a al hna.
